​Bəxtiyar Əmiraslanov 1971-ci il sentyabrın 11-də İsmayıllı rayonunun Müdri sovetliyinin Daxar kəndində (Soru məhəlləsində) ziyalı — müəllim ailəsində anadan olmuşdur. İlk təhsilinə Cülyan ümumi orta məktəbində başlayan Bəxtiyar, daha sonra ailəsi ilə birlikdə İsmayıllı rayon mərkəzinə köçmüş və təhsilini İsmayıllı kənd orta məktəbində (indiki Natiq Behdiyev adına İsmayıllı şəhər 6 saylı tam orta məktəbi) başa vurmuşdur.
​1989–1991-ci illərdə Sovet Ordusu sıralarında, Rusiyanın Tomsk şəhərində hərbi xidmətdə olmuş, nizam-intizamı və qorxmazlığı ilə seçilmişdir.
​
​1992-ci ildə Vətənimizin başı üstünü qara buludlar alanda Bəxtiyar Əmiraslanov da minlərlə könüllü kimi hərbi xidmətə yollanmış, Vətənin müdafiəsinə qalxmışdır. O, 13 oktyabr 1992-ci ildə Ağdam uğrunda gedən ağır döyüşlərə qatılmış, düşmənə sarsıdıcı zərbələr endirərək mərdi-mərdanə döyüşmüşdür.
​29 oktyabr 1992-ci ildə Xocalı rayonunun Pirlər (Xramort) kəndi uğrunda gedən şiddətli döyüşlərdə Bəxtiyar Əmiraslanov cəsarətlə vuruşaraq qəhrəmancasına şəhidlik zirvəsinə ucalmışdır. Şəhid olduğu ərazidən cənazəsini götürmək mümkün olmadığı üçün o, bizim yüzlərlə məzarsız şəhidimizdən birinə çevrilmişdir.
​
​Yaşasaydı, 11 sentyabr tarixində Bəxtiyar Əmiraslanovun 55 illik yubileyini doğmaları ilə birlikdə böyük təntənə ilə qeyd edəcəkdik. Qısa, lakin şərəfli bir döyüş yolu keçən qəhrəman əmim müqəddəs amal uğrunda canını fəda etdi.
​Şəhidlər ölməz, Vətən bölünməz! Ruhun şad, məkanın cənnət olsun, Əmi! Bu xalq sizin kimi igidlərin ruhları qarşısında baş əyir. Allah rəhmət eləsin...

Esmira Əlişova,
aparıcı