Xəbərlər
Yusif Nəğməkar : BİRLƏŞİR
Tel də ötürür sirr telə...
Asta-asta, gilə-gilə
Bəmlə zil pərdə birləşir.
Qalib, yarışda yüksəlib,
Son məğlub-yürüşdə Səlib...
Rəqib oyunçular gəlib
"Şahmat"da, "nərd"də... birləşir.
Göyüzü ulduzdu, Aydı,
Yerdə yaz, qış, payız, yaydı.
Çiçək, daş, torpaqdı, çaydı --
Zərif də, sərt də birləşir.
Söz dən kimi üyünməsin...
Ürək qəmlə döyünməsin,
Çoxu çox da öyünməsin,
Hər çox da fərddə birləşir.
Ərisə də yanan şamlar,
Başa yetsin arzu-kamlar!
Ayrı-ayrı saf adamlar
Bir doğru şərtdə birləşir...
Sevgi boy atır hələ də...
Dönüklər dönür tələdə...
Hər depremdə-zəlzələdə
Qorxaq da, mərd də birləşir.
Ömür-gün qısa yolsa da;
Payızda yarpaq solsa da...
Can candan ayrı olsa da,
Kədərdə, dərddə birləşir...
11.09.2026.
