MƏMMƏD QƏDİR : Uşaqları qoru İlahi

Xəbərlər

15.07.2026, 00:05

MƏMMƏD QƏDİR : Uşaqları qoru İlahi - FOTO

Verərəm can adlı borcunu minqat,
Köpək hesab elə, ruzimə yal qat,
Bircə körpələrin bəxtinə bal qat,
Mənə ver zəhrimar, çoru, İlahi,
Qoru uşaqları, qoru, İlahi.

Hərə verdiyini borclara çözür,
Bəxtli üsyan edir, bədbəxti dözür,
Kasıb yapdığın göz yaşında üzür,
Varlı dənizə at toru, İlahi,
Qoru uşaqları, qoru, İlahi.

Çiçək qulluğunda, gül işdədilər,
Çıxışda biz varıq, girişdədilər,
Yapdığın ən mağmın fəriştədilər,
Aydan arı, sudan duru, İlahi,
Qoru uşaqları, qoru, İlahi.

Uşaq da anlayıb, "bismillah" desin,
Min ruzi verən kim, bir Allah desin,
Yağlını, qaymağı ver şeytan yesin,
Bizdən əsirgəmə şoru, İlahi,
Qoru uşaqları, qoru, İlahi.

Bir yol yaratmısan, beşikdən gora,
Görünmür baxana, görsənir kora,
Göz üstə qaşın var deyən yox zora,
Məzlumdan sorulur soru, İlahi,
Qoru uşaqları, qoru, İlahi.

Onsuz da rəhminə nəzir, niyazıq,
Qavalda coşqunun neydə nə yazıq,
Məzluma çatırmış hökmün, nə yazıq,
Zorlulara göstər zoru, İlahi,
Qoru uşaqları, qoru, İlahi.

Sevgidən ayrı bir söhbət eləmə,
Yaratdığın qövmə nifrət eləmə,
İşıqlı dünyanı zülmət eləmə,
İşığa qərq elə koru, İlahi,
Qoru uşaqları, qoru İlahi.

Al Məmmədi yandır kömür yerinə,
Cəhənnəm yaşayım ömür yerinə,
Kəsib ömrümdən səp ömürlərinə,
Beşikdən qəbrəcən nuru, İlahi,
Qoru uşaqları, qoru, İlahi.