Yay aylarında Azərbaycana gələn turistlərin sayı artır. Bunun əsas səbəblərindən biri ölkənin müxtəlif iqlim qurşaqlarına malik olması, zəngin tarixi, mədəni və coğrafi imkanlarının olmasıdır. Yay mövsümündə turistlər həm dəniz turizmi, həm də dağ və təbiət turizmi üçün ölkəyə səfər edirlər.

Bunu AZƏRTAC-a açıqlamasında turizm üzrə ekspert Cəfər Qarayev söyləyib.

Onun sözlərinə görə, xüsusilə körfəz ölkələrindən gələn turistlər yay aylarında daha sərin iqlimə malik bölgələrdə istirahət etməyə üstünlük verirlər.

“Onlar istirahət, təbiət mənzərələri və rahat turizm imkanlarından yararlanmaq üçün ölkəmizə səfər edirlər. Turistlər əsasən şimal və şimal-qərb bölgələrinə, eləcə də Böyük Qafqaz dağlarının ətəyində yerləşən rayonlara üz tuturlar. Bu bölgələrdə yerləşən hotellər və istirahət mərkəzləri daha çox yay mövsümündə fəaliyyət göstərir. Son illərdə viza prosedurlarının sadələşdirilməsi və elektron viza imkanlarının genişləndirilməsi turizm axınının artmasına müsbət təsir göstərir. Bu səbəbdən cari ildə yay turizm mövsümünün daha canlı və aktiv keçəcəyi gözlənilir”,- deyə C.Qarayev əlavə edib.