Əsrlər dəyişsə də, xislət nəysə dəyişmir

Xəbərlər

21.01.2026, 12:18

Əsrlər dəyişsə də, xislət nəysə dəyişmir - FOTO

Hər kəsə şamil deyil şeir.
Bu şeir çox davamlı alındı,inanmıram kimsə oxuya).

Sığmır zaman saata, əqrəb qaçır, tələsir,
Vərdişin zindanında adamlar qalıb əsir.
Dünya yenilənsə də, söz kələfdə dil kəsir,
Əsrlər dəyişsə də, xislət nəysə dəyişmir.

Min illərin nöqsanı dəbdədir, dəbdə hələ,
Dövrün adı müasir — daş dövrüdür, daş lələ!
Yenə həmən hiylələr, yenə həmin tor, tələ,
Əsrlər dəyişsə də, xislət nəysə dəyişmir.

Nə olsun təzə cildlər,qandadır, qopmayır şər,
Bu adətdən inanmam örnək götürə bəşər.
Belə halda hər kəsə həyat çox qəlizləşər,
Əsrlər dəyişsə də, xislət nəysə dəyişmir.

İnsanlıqdan dəm vurub, vicdanı lal qoyuruq,
Biz tərəqqi etmirik, nə var ondan doyuruq.
Kiçilmiş ürəkləri paxıl-paxıl duyuruq,
Əsrlər dəyişsə də, xislət nəysə dəyişmir.

Ətrafı gül görürük, hər şey gözəldir, çiçək,
Daha hansı yalandan özümüzə don biçək?
Köhnə fikirlər ilə nə qədər kədər içək?
Əsrlər dəyişsə də, xislət nəysə dəyişmir.

Dövranın köhlənini çapırıq, gözdə pərdə,
Ruhun quyusu dolmur qızılla kərdə-kərdə.
Gülüşlər arxalanır dərdə kənddə, şəhərdə,
Əsrlər dəyişsə də, xislət nəysə dəyişmir.

Tərifin kölgəsində yatırıq xımır-xımır,
Durub qeybət edirik, neçə ki dolu yağmır.
Az tapılar insaflı, imkan düşəndə sağmır,
Əsrlər dəyişsə də, xislət nəysə dəyişmir.

Mərhəmətlik altında güdürük dərya niyyət,
Qonşunun yıxılmağı — içdə qalmış mahiyyət.
Afiq, köhnələrdənik, əcdadlar yeyib çiy ət,
Əsrlər dəyişsə də, xislət nəysə dəyişmir.