Süni intellektin kino sənayesində getdikcə daha geniş istifadə olunması ənənəvi kinematoqrafiyanın gələcəyi ilə bağlı müzakirələri artırıb. Mütəxəssislər hesab edirlər ki, AI əsaslı filmlər klassik kinonu tamamilə əvəz etməyəcək, lakin sektorda yeni və daha sürətli istehsal formatlarının yaranmasına səbəb olacaq.

Astana Süni İntellekt Film Festivalı (AAIFF)in həmtəsisçisi və kreativ direktoru Ayzatulla Hüseyn süni intellektin kino sənayesinə təsirindən danışıb.

Onun sözlərinə görə, AI-kino gələcəkdə daha çox qısametrajlı filmlər və seriallar kimi ayrıca formatlarda inkişaf edə bilər.

“Düşünmürəm ki, süni intellektlə hazırlanan kino ənənəvi kinematoqrafiyanı tamamilə əvəz edəcək. Daha çox özünəməxsus formalar yaradacaq. Məsələn, qısametrajlı filmlər və seriallar. Vaxtilə teatrda olduğu kimi, ənənəvi kinonun sayı müəyyən qədər azala bilər, lakin keyfiyyətinin yüksəlməsi mümkündür”, – Hüseyn bildirib.

O hesab edir ki, ənənəvi kino gələcəkdə daha çox klassik çəkiliş üsullarına, o cümlədən lent üzərində çəkilişlərə müraciət edə bilər. Bununla yanaşı, süni intellekt vasitəsilə sürətlə hazırlanan kontentin həcmi artacaq.

Mütəxəssisin fikrincə, ənənəvi və AI əsaslı kino paralel şəkildə inkişaf edəcək. Bəzi layihələrdə bu iki istiqamət bir-birindən ayrı qalacaq, digərlərində isə eyni layihə çərçivəsində birləşəcək.

“Bir nəfər kompüter arxasında öz filmini yarada bilər”
Ayzatulla Hüseyn süni intellektin kino sənayesinə gətirdiyi ən böyük dəyişikliklərdən birinin kontent istehsalının daha əlçatan olması olduğunu bildirib.

Onun sözlərinə görə, artıq böyük çəkiliş qrupuna və milyonlarla dollar büdcəyə sahib olmadan da film hazırlamaq mümkündür.

“Əsas dəyişiklik kontent istehsalının demokratikləşməsidir. Festivalımız üçün iş hazırlayanların çoxu tək çalışan yaradıcı şəxslərdir. Kiçik bir yaşayış məntəqəsində yaşayan adi bir insanın ideyası ola bilər, kompüter qarşısına keçib öz filmini hazırlaya və onu bütün dünyaya göstərə bilər. Bu, hələ başlanğıcdır”, – o qeyd edib.

Hollivudla rəqabət hələ çətindir
AAIFF-in həmtəsisçisi və idarə heyətinin sədri Almas Jali isə bildirib ki, AI vasitəsilə hazırlanan filmlərin ənənəvi Hollivud istehsalı ilə rəqabət aparması hələlik asan deyil.

Bununla belə, süni intellekt yaradıcı şəxslərə öz hekayələrini daha az xərc və daha qısa müddətdə ekranlaşdırmaq imkanı verir.

Mütəxəssislərin fikrincə, bunun əsas üstünlüyü ondan ibarətdir ki, müəlliflər ideyalarının başqa rejissor və ya prodüser tərəfindən həyata keçirilməsini gözləmədən, öz baxışlarını birbaşa tamaşaçıya çatdıra bilirlər.

Beləliklə, süni intellekt ənənəvi kinonu sıradan çıxarmaqdan daha çox, kino sənayesində yeni istehsal formalarının və müstəqil yaradıcıların sayının artmasına şərait yarada bilər.