"QƏRƏNFİL - ŞƏHİD GÜLÜM"

Xəbərlər

19.01.2026, 19:56

"QƏRƏNFİL - ŞƏHİD GÜLÜM" - FOTO

Bir vaxt vardı güllərin
Ən gözəli sən idin.
Sevənlərin əlində
Çox bəxtiyar, şən idin.

Ağ örpəkli gəlintək,
Bəzənmiş ləçək - ləçək.
Əllər xınadan bəzək,
Toy, nişana tən idin.

Nazın canlar alırdı,
Qəlblərə od salırdı.
Hər kəs razı qaırdı,
Sevən, sevilən idin.

Üzü dönsün fələyin,
Tərs gətirdi taleyin.
Qan oldu al bələyin
İzlərdə dən - dən idin.

Qanlı Yanvar gününü,
Görüb yaşadın hüznü.
Xalqın o ağır günü,
Gül bağrın sökən idin.

Azadlığın yolusan,
Bağrı qanla dolusan.
Şəhidlik simvolusan,
Yad gözə tikən(tikan) idin.

Gül üçün deyil asan,
Ana kimi yanasan.
Şəhidlərə anasan.
Başı duman, çən idin.

Azadlıq aşiqləri,
Canlı düşmən çəpəri.
Qan oldu sinələri,
Gül məlhəm çəkən idin.

Susmuş şəhid səsisən,
Ona sonsuz sevgisən.
Bacısan, sevgilisən,
Zülməti sökən idin.

Həm zərifsən, həm zəfər,
Həm kədərsən, həm təpər.
Üsyan, coşqu, güc, hünər,
ŞƏHİD GÜL! O, sən idin.

"Qərənfil - şəhid gülüm",
Yaş tökmə zülüm - zülüm.
Ölsəm sənə bükülüm,
Sən də gül kəfən idin.