Çexiya Müdafiə Nazirliyi iki MILSATCOM hərbi peyk şəbəkəsinin idarəetmə stansiyalarının alınması ilə bağlı böyük müqavilənin imzalandığını elan edib.

Turaztv.az AZƏRTAC-a istinadən xəbər verir ki, sövdələşmə 2,82 milyard Çexiya kronu (təxminən 112 milyon avro) dəyərində qiymətləndirilir. Bura təkcə avadanlığın tədarükü deyil, həm də 11 il ərzində texniki xidmət, maddi-texniki dəstək və kadr hazırlığı daxildir. Müdafiə Nazirliyinin açıqlamasına görə, yeni stansiyalar ABŞ Müdafiə Əməkdaşlığı Agentliyi (DSCA) vasitəsilə alınacaq. Komplekslər LET (Large Enterprise Terminals) stasionar baza stansiyaları əsasında qurulub. Avadanlığın çatdırılması 2027-ci ilə planlaşdırılır.

Nazirlik vurğulayıb ki, MILSATCOM-un tətbiqi Çexiyanın müdafiə qabiliyyətinin gücləndirilməsi və NATO-nun kommunikasiya infrastrukturuna inteqrasiyası istiqamətində səylərinin mühüm tərkib hissəsidir. Yeni sistem ordunu xarici müdaxilələrə və kiberhücumlara davamlı etibarlı və təhlükəsiz məlumat mübadiləsi kanalları ilə təmin edəcək.

Müdafiə Nazirliyinin nümayəndələrinin sözlərinə görə, müasir peyk texnologiyaları Çexiya hərbçilərinə real vaxt rejimində əməliyyatları əlaqələndirməyə və döyüş meydanında baş verənlərin hərtərəfli mənzərəsini əldə etməyə imkan verəcək. Bu da qoşunların idarə edilməsini və müttəfiqlərlə qarşılıqlı əlaqələrin səmərəliliyini əhəmiyyətli dərəcədə artıracaq.