Bu yayın son ayı mədəniyyət sahəsində böyük itkiləri ilə yadda qaldı. Avqustda bir neçə sənətkar, yazıçı, musiqiçi və teatr xadimi dünyadan köçsə də, ölkəmizdə yaradıcı mühitin inkişafına verdikləri töhfələrlə daim xatırlanacaqlar.

“Qafqazinfo” avqustda itirdiyimiz mədəniyyət xadimləri ilə bağlı qısa xülasəni təqdim edir:

Ayın ilk günü Azərbaycan musiqi mədəniyyətinə ağır itki üz verdi. Xalq artisti, muğam sənətinin görkəmli nümayəndəsi Arif Babayev 87 yaşında vəfat etdi. Sənətkarla Beynəlxalq Muğam Mərkəzində vida mərasimi keçirildi və o, 1-ci Fəxri xiyabanda dəfn olundu.

1938-ci ildə Ağdamın Sarıhacılı kəndində doğulan xanəndənin yaradıcılığında “Şur”, “Segah” muğam dəstgahları, “Arazbarı”, “Qarabağ şikəstəsi” zərbi muğamları xüsusi yer tutur. O xüsusilə “Segah”ı təkrarolunmaz üslubda ifa etməsi ilə yadda qaldı.

Avqustun 2-si Şəki Dövlət Dram Teatrının aktrisası Brilyant Babayeva dünyasını dəyişdi. O, 1963-cü ildə Şəki şəhərində anadan olmuşdu. 63 yaşlı aktrisa 45 ilə yaxın Şəki Dövlət Dram Teatrında çalışmışdı.

Xalq yazıçısı Elçin Əfəndiyev də bu ayda itirdiyimiz mədəniyyət xadimlərindən oldu.

Avqustun 3-ü vəfat edən yazıçı ilə növbəti gün Azərbaycan Dövlət Gənc Tamaşaçılar Teatrında vida mərasimi keçirildi. Elçin 1-ci Fəxri xiyabanda atası, Azərbaycan SSR Xalq yazıçısı İlyas Əfəndiyevin yanında torpağa tapşırıldı.

82 yaşında dünyasını dəyişən Elçin görkəmli yazıçı olmaqla yanaşı nasir, dramaturq, tənqidçi, ədəbiyyatşünas, filologiya elmləri doktoru, professor, Azərbaycan Yazıçılar Birliyinin (AYB) üzvü, Azərbaycan Xalq yazıçısı (1998), “İstiqlal” ordenli (2003) dövlət və ictimai xadim idi. Onun zəngin yaradıcılığında romanlar, povestlər, pyeslər və elmi-tənqidi əsərlər xüsusi yer tutur. Elçinin “Mahmud və Məryəm”, “Ağ dəvə”, “Baş”, “Bayraqdarlar” kimi əsərləri Azərbaycan ədəbiyyatının “Qızıl fond”una daxil olub.

Avqustun 13-də isə şair, nasir, jurnalist Kəramət Şükürovun küçədə meyiti tapıldı.

1957-ci ildə Masallının Göyçöl kəndində anadan olan şair AYB-nin Natəvan adına klubunun direktoru olub. Bir sıra qəzetlərlə əməkdaşlıq edib.

68 yaşında vəfat edən K. Şükürovun küçədə ölməsi hər kəsi dərindən sarsıtdı.

63 yaşlı yazıçı, prodüser Vüqar Tapdıqlı da bu ayda dünyasını dəyişdi.

Avqustun 14-ü vəfat edən yazıçı 1962-ci ildə Gədəbəydə anadan olub. 1985-2009-cu illərdə Azərbaycan televiziyasında çalışıb, uzun müddət “Azərbaycantelefilm” Yaradıcılıq Birliyinin rəhbəri, Azərbaycan Dövlət Foto-Kino Sənədləri Arxivinin direktoru olub.

Avqustun 16-sı isə Vidadi Babanlını itirdik. 98 yaşında dünyasını dəyişən yazıçı doğulduğu Qazax rayonunda dəfn edildi.

“Şöhrət” ordenli yazıçı “Anam sən oldun”, “Dərd məni dinləndirir”, “Öz evində qonaq”, “Mənim gizlinlərim” kimi nəsr əsərlərinin müəllifidir. V. Babanlının “Vicdan susanda”, “Gəlin”, “Ömürlük cəza” adlı məşhur kitabları var.

Bir neçə gün sonra, avqustun 19-da şair Məmməd İsmayıl vəfat etdi.

O, 1939-cu ildə Tovuz rayonunun Əsrik Cırdaxan kəndində anadan olmuşdu.

Şair “Ana əlləri”, “Dünyaya baxıram”, “Söz vaxtına çəkər” kimi şeirləri, “Xalq nəğmələri”, “Sazın söz karvanı”, “Yoxun varlığı” kimi kitabları ilə tanınıb.

M. İsmayıl ürək çatışmazlığı və yanaşı xəstəliklərdən əziyyət çəkirdi, ölüm səbəbi isə ağciyər xərçəngi olub.

Bu ayda itirdiyimiz mədəniyyət xadimlərindən sonuncusu isə 86 yaşlı şair Arif Əbdüloğlu (Arif Əbdül oğlu İsmayılov) oldu.

Avqustun 20-si dünyasını dəyişən publisist Prezident İlham Əliyevin 21 iyul 2025-ci il tarixli Sərəncamı ilə 3-cü dərəcəli “Əmək” ordeni ilə təltif olunmuşdu. Onun 2019-cu ildə nəşr olunmuş “Vətəndir sevdiyim, sevildiyim yer”, eləcə də 2024-cü ildə işıq üzü görmüş “Bütövləşən vətənim” kitabları oxucular tərəfindən böyük rəğbətlə qarşılanıb.


Lamiyə Məmmədova