İyulun 1-də Milli Məclisin sədri Sahibə Qafarova Özbəkistana işgüzar səfəri çərçivəsində “Yeni üfüqlərə doğru: Dialoqdan birgə fəaliyyətə” mövzusuna həsr olunmuş Birinci Özbəkistan-Azərbaycan parlamentlərarası Forumunun bağlanış mərasimində çıxış edib.

Bu barədə AZƏRTAC-a Milli Məclisin Mətbuat və ictimaiyyətlə əlaqələr şöbəsindən məlumat verilib.

Sahibə Qafarova bildirib ki, forumun zəngin proqramı, canlı fikir mübadiləsi və gün ərzində aparılan məqsədyönlü müzakirələri böyük iş görüldüyünü söyləməyə əsas verir. O diqqətə çatdırıb ki, bu forum çərçivəsində keçirilən panel sessiyalarda bir çox mühüm məsələlər üzrə də hərtərəfli müzakirələr aparılıb. Panel müzakirələrin mövzuları təkcə parlament komitələrinin fəaliyyətinin əsas aspektlərini deyil, həm də ölkələrimizin bu gün fəal əməkdaşlıq etdiyi istiqamətləri əks etdirir.

Milli Məclisin sədri qeyd edib ki, qarşıya qoyulmuş bütün vəzifələr uğurla yerinə yetirilib. Lakin bu, yalnız başlanğıcdır. Bu forumla gələcək hərtərəfli, möhkəm və dərinləşmiş əməkdaşlığın təməli qoyulur və parlamentlərarası forum dialoqun mühüm platforması və səmərəli mexanizmi olacaq.

Bağlanış mərasimində çıxış edən Özbəkistan Ali Məclisi Senatının sədri Tənzilə Narbayeva forumun əhəmiyyətindən danışaraq, tədbirdə müzakirə edilmiş məsələlərin vacibliyini qeyd edib. O, forumda aparılmış konstruktiv fikir mübadiləsinin ölkələrimiz və xalqlarımız arasında münasibətlərin daha da genişlənməsinə öz töhfəsini verəcəyinə inamını ifadə edib. Tənzilə Narbayeva diqqətə çatdırıb ki, Özbəkistan-Azərbaycan parlamentlərarası Forumu parlament əməkdaşlığımızın keyfiyyətcə yeni səviyyəyə qədəm qoyduğunun təcəssümüdür.

Tənzilə Narbayeva ölkələrimiz arasındakı dostluq münasibətlərinin daha da möhkəmlənməsində dövlət başçılarımızın xüsusi rolunu qeyd edərək, onların prinsipial mövqeyi sayəsində əlaqələrimizin strateji tərəfdaşlıq səviyyəsinə yüksəldiyini qeyd edib.

O bildirib ki, son illər bir sıra sahələrlə yanaşı, parlamentlərimizin də əlaqələri daha da inkişaf edir, qarşılıqlı səfərlərin və görüşlərin sayı artır. Bu baxımdan parlamentlərarası komissiyanın yaradılması əməkdaşlığımızın inkişafında yeni mərhələdir.

Tədbirin sonunda Xivə Bəyannaməsi qəbul edilib.