Qazaxıstanın Almatı şəhərində keçirilən yarımarafonda iki iştirakçının həyatını itirməsindən sonra kütləvi idman tədbirlərinin keçirilməsi qaydaları sərtləşdiriləcək.

Turaztv.az AZƏRTAC-a istinadən xəbər verir ki, bu barədə ölkənin turizm və idman naziri Yerbol Mırzabosınov instaqram səhifəsində məlumat verib.

“Kütləvi idman təhlükəsiz olmalı və yüksək təşkilat standartlarına cavab verməlidir. Turizm və İdman Nazirliyi bu məsələ ilə bağlı konkret təkliflər hazırlayaraq aidiyyəti qurumlara təqdim edəcək”, – deyə o bildirib.

Mırzabosınov iki iştirakçının ölümünü “xüsusi diqqət tələb edən faciəvi hadisə” adlandıraraq qeyd edib ki, baş vermiş insidentlə bağlı hərtərəfli yoxlama aparılır. İştirakçıların sağlamlıq vəziyyəti, yarışın təşkili, tibbi təminat səviyyəsi və təhlükəsizlik qaydalarına əməl olunması təhlil edilir.

“Almaty Half Marathon” yarışında faciə aprelin 20-də baş verib. İştirakçılardan 84 yaşlı Akkoyan Rsaliev və 21 yaşlı Nurbol Əhmədi yarış zamanı vəfat ediblər. Onlar mütəmadi olaraq qaçış yarışlarında iştirak edirmişlər.

Rsalievin halı marafonun ilk kilometrində pisləşib. Təcili tibbi yardım briqadası bir dəqiqə içində hadisə yerinə gəlib, lakin nəbzi olmayıb. Həkim Alibek Xojanazarovun sözlərinə görə, ilkin diaqnoz ağciyər arteriyasının tromboemboliyası olub. Onun xroniki arterial hipertenziyası da var imiş.

Əhmədi isə 16-cı kilometrdə huşunu itirib. Həkimlər onu reanimasiya etməyə çalışsalar da, təcili yardım gələnə qədər vəfat edib. Onun üçün də ilkin diaqnoz ağciyər arteriyasının tromboemboliyası və kəskin ürək çatışmazlığı olub.

Son hadisə Qazaxıstanda bu cür ilk faciə deyil. Belə ki, 2023-cü ildə “Tengri Ultra” marafonunun iştirakçısı Ruslan Joldıbayev Almatı vilayətində finişə bir neçə metr qalmış vəfat edib. Ölüm səbəbi ürək dayanması olub.

2022-ci ildə “Almatı marafonu”nda 47 yaşlı Rüstəm Sadıkov 10 kilometrlik məsafəni qət etdikdən sonra vəfat edib. Həkimlər onun ürəyini işə salsalar da, iki dəqiqə sonra yenidən dayanıb. 2018-ci ildə isə 18 yaşlı Maksim Korolyov vəfat edib, səbəb eyni idi, yəni qəfil ürək dayanması.