Nakam məhəbbətim qəlbimdə qalıb,
Sınmış bir ağacın budaqları tək.
Sənli xəyallarım avara qalıb,
Dərin dəryalarda üzən gəmi tək...

Sən getdin, ürəkdə xatirən qalıb,
Itkin bir gəlinin göz yaşları tək.
Ulduzlar göylərdən həsrətlə baxır,
Nakam sevgimizin keşikçisi tək.

Gecəylə-gündüzüm avara qalıb,
Bir dəli ürəyin döyüntüsü tək.
Intizarlı baxış yollarda qalıb,
Həsrətli vüsalın son nəğməsi tək.

Ürəkdə hələ də bir ümid qalıb,
Dəli kimi axan coşqun sellər tək.
Sonsuz məcralara sığmayıb qalıb,
Nakam məhəbbətin son nəğməsi tək...

Bəxtim qara gəldi axı nə edim???
Həyatın gərdişi bu imiş demək.
Cavabsız sevgidən incidim yenə,
Talehin amansız bir zərbəsi tək.

Sənin gözlərindən süzülən bir yaş,
Mənim gözlərimdə quruyacaqdır...
Sənin topuğuna toxunan bir daş,
Mənim ürəyimə saplancaqdır.

Həyatın ən gözəl anında belə,
Səninlə bir ömür yaşanacaqdır.
Bəs niyə həsrətin bitdiyi yerdə,
Ayrılıq nəğməsi çalınacaqdır...

Gecə yarı, xəyallara dalıram,
İlk görüşü, son görüşü anıram.
Daş pilləni hey yadıma salıram,
Qalxır-enir yavaş - yavaş pillələr.
Yuxuma gəl, qar döşənmiş pillələr...

Xatirələr hey canlanır gözümdə,
Şirin sözün yaddaşımda, sözümdə.
Sənli, sənsiz qocalıram özüm də,
Qalxır-enir yavaş - yavaş pillələr.
Yuxuma gir, qar döşənmiş pillələr...

Şəhla Yaşar sorağında gəzərsən,
Sözlərinə bal-şəkəri düzərsən,
Qəribsəyib birdən sən də deyərsən
Qalxır-enir yavaş - yavaş pillələr.
Yuxuma gir, qar döşənib, pillələr...