Məlumdur ki, Türkiyənin reytinq birincisi “Uzak Şehir” serialı yayıma başladığı gündən həm tənqid, həm də təqdirlə qarşılanıb.

“Qafqazinfo”nun məlumatına görə, ilk bölümlərdə çəkilişlərin aparıldığı Mardin bölgəsinin mədəniyyətinə dair bəzi səhnələr yerli əhali və müxtəlif qurumlar tərəfindən tənqid edilib. Hətta məsələ Türkiyə Böyük Millət Məclisinə qədər gedib çıxıb. Millət vəkilləri serialın yayımının dayandırılmasını istəyiblər.

Amma artıq demək olar ki, “Uzak Şehir”ə münasibət müsbətə doğru dəyişib. Hətta bu günlərdə Mardin valisi Tuncay Akkoy serial qəhrəmanı Ozan Akbaba (Cihan) və onun qardaşı rolunu oynayan Atakan Özkayanı (Kaya) inzibati binadakı kabinetində rəsmi şəkildə qəbul edib.

Görüş zamanı T.Akkoy aktyorlarla Mardinin zəngin tarixi, mədəniyyəti və ənənələri barədə söhbət aparıb. Akkoy serial vasitəsilə şəhərin tanıdılmasına və bölgəyə olan turistik marağın artmasına verdikləri töhfəyə görə aktyorlara təşəkkür edib. Vali qeyd edib ki, “Uzak Şehir” kimi layihələr Mardinin yalnız tarix və memarlıq baxımından deyil, həm də mədəni irs baxımından dəyərli bir coğrafiya olduğunu göstərir.