“Qarabağ”ın baş məşqçisi Qurban Qurbanov Azərbaycan kubokunun ilk oyunu çərçivəsində “Araz-Naxçıvan”la keçirilən oyunda penalti epizodunda əsəbiləşərək planşeti sındırmasından danışıb.

"Turaztv.az" “Qafqazinfo”-ya istinadən xəbər verir ki, o, jurnalistin “Avrokubok oyunlarında “Qarabağ”a qarşı yanlış qərarlar verilib. Amma heç vaxt bu qədər aqressiv olmamısınız. Belə fikir yaranır ki, Qurban Qurbanov sanki yerli komandalara məğlub olmağı bacarmır...” sualına belə reaksiya verib:

“Yox, niyə ki? Dəfələrlə məğlub olmuşam və özümü normal aparmışam. İnsanıq da, aqressiya olur. Ola bilər ki, epizod penalti idi. Deyirlər ki, penalti kosmosdan görünməlidir. Mən də istəyirəm ki, oyun daha sürətli, dinamik getsin. Oyunda pauza həddindən çox oldu. Hakim də öz ritmini itirir. Yerli komandalara məğlubiyyəti qəbul etməməyimlə bağlı fikri qəbul etmirəm. Əksinə, çox istəyərəm ki, hər komanda “Qarabağ”a qalib gəlsin və o klubun rəhbərliyində futbola sevgi daha da çox olsun, maraq böyüsün. Biz də insanıq, ömür boyu sakit ola bilmərik. Planşetə penalti epizoduna görə vurdum. Onu da gördüz, gözdən qaçırmadız”.

Qeyd edək ki, komandalar arasında keçirilən ilk oyun Ağdam təmsilçisinin 0:1 hesablı məğlubiyyəti ilə yekunlaşıb.