Turaztv.az AZƏRTAC-a istinadən xəbər verir ki, pravoslav xristianlar böyükdən-kiçiyə, dini bayramlarında kilsəyə gəlir, dua edir, şam yandırırlar. Onlar noyabrın 28-dən yanvarın 6-na kimi oruc tutaraq buna 40 gün hazırlaşırlar. Kilsələrdə zənglər çalınır, dualar oxunur, Vifleyemdən gətirilmiş odla şamlar yandırılır.

Milad möminlər üçün ən böyük bayramlardan biridir. Onlar Xilaskar İsanın mövludu gününü öz dinlərinin yarandığı gün hesab edirlər.

Azərbaycanda xristianlığın çox qədim tarixi var. Təsadüfi deyil ki, Qafqazda ilk xristian kilsələri məhz bizim ölkədə yaranıb. Əsrlər boyu dünya dinləri torpağımızda dinc yanaşı yaşamış, insanlar arasında dostluq və qardaşlıq münasibətlərinin qurulmasında əvəzsiz tarixi rol oynamışdır. Azərbaycanda heç vaxt milli-irqi ayrı-seçkilik və ya dini dözümsüzlük halları olmayıb.

Unikal geosiyasi məkanda yerləşən Azərbaycanın tarixi və mədəniyyətində bütün dünya dinlərinin yüksək mənəvi dəyərləri əks olunub.
Tarixən formalaşmış tolerantlıq və dözümlülük cəmiyyətimizi səciyyələndirən gözəl ənənəyə çevrilib. Əsası Ümummilli Lider Heydər Əliyev tərəfindən qoyulmuş dövlət-din münasibətləri konsepsiyasının uğurla həyata keçirilməsi nəticəsində bu ənənə daha da inkişaf etməyə və zənginləşməyə başladı.
Ölkəmizin rəhbərliyi Azərbaycanda sülhün, əmin-amanlığın, vətəndaş həmrəyliyinin möhkəmləndirilməsi, dilindən, dinindən, etnik mənsubiyyətindən asılı olmayaraq hər bir vətəndaşın hüquq və azadlıqlarının təmin edilməsi istiqamətində səylərini davam etdirir.
Qeyd edək ki, nümayəndələri ölkəmizin tamhüquqlu vətəndaşları olan pravoslav xristian icması öz dil və mədəniyyətini, inancını qoruyub saxlayaraq, öz milli və dini bayramlarını azad şəkildə qeyd edir, Azərbaycanda böyük quruculuq işlərində, dövlət müstəqilliyinin möhkəmləndirilməsində öz vətəndaşlıq borcunu layiqincə yerinə yetirir.
Ötən gün Azərbaycan Prezidenti İlham Əliyev Azərbaycanın pravoslav xristian icmasını Milad bayramı münasibətilə təbrik edib. Ölkəmizin bütün xristian icmasına cansağlığı və xoşbəxtlik arzulayan dövlət başçısı müraciətində qeyd edib: “Azərbaycanda əsrlərdən bəri xristian dininin mənsubları digər xalqların və konfessiyaların nümayəndələri ilə birgə mehriban dostluq, sülh və əmin-amanlıq mühitində yaşayırlar. Ölkəmizdə etnik-mədəni müxtəlifliyin və zəngin tolerantlıq ənənələrinin qorunub saxlanılması, mədəniyyətlərarası və dinlərarası dialoqun inkişafına qlobal miqyasda dəstək göstərilməsi apardığımız siyasətin başlıca istiqamətlərindəndir.
Cəmiyyətimizdə demokratik, hüquqi dövlətçilik prinsipləri, mütərəqqi dövlət – din münasibətləri bərqərar edilmişdir. Nümunəvi mültikulturalizm məkanı kimi tanınan Azərbaycanda dilindən, dinindən, etnik mənsubiyyətindən asılı olmayaraq, hər kəs eyni hüquq və azadlıqlara malikdir. Xristian həmvətənlərimiz də inanclarına uyğun ayin və mərasimləri sərbəst şəkildə həyata keçirməklə öz adət-ənənələrini layiqincə yaşadır, vətəndaşlıq borcunu vicdanla yerinə yetirərək, Azərbaycanın ictimai-siyasi, sosial-mədəni həyatında yaxından iştirak edirlər”.
Azərbaycanın paytaxtında Müqəddəs Mürdaşıyan Zənənlər Kafedralında Milad bayramı mərasimi başlamazdan əvvəl kilsənin baş keşişi, Bakı və Azərbaycan yeparxiyasının katibi Arximandrit Aleksi (Nikonorov) jurnalistlərə müsahibəsində deyib: “Xristianları və bütün Azərbaycan vətəndaşlarını Milad bayramı münasibətilə səmimi-qəlbdən təbrik edirəm. İsanın mövludu günü bütün bəşəriyyətin həyatında yeni bir mərhələdir, çünki bütün qədim peyğəmbərliklərdə insanın Allahla barışmasının məhz burada və indi baş verəcəyi deyilir. İsa Peyğəmbər bu dünyaya bir vaxtlar Ədən bağında günah işlətmiş, ilkin günah işlətmiş və indi bütün əməllərində və səylərində bağışlanma və Allahın köməyini alan bəşəriyyəti yenidən birləşdirmək üçün gəldi”.

Rus Pravoslav Kilsəsinin nümayəndəsi bu gün Azərbaycan torpağında ilk dəfə Milad bayramını böyük sevinclə qeyd etdiyini vurğuladı:
“Azərbaycan torpağı, Azərbaycan xalqı - bu, mənim buradakı xidmətimi həsr etdiyim meyarlardır. Ümid edirəm ki, Milad bayramı və Uca Tanrı bu sevincli gündə Azərbaycana, bu bərəkətli torpaqda yaşayan hər bir insana bolluq və əmin-amanlıq bəxş edəcək. Biz, pravoslav xristianlar, Azərbaycanın bütün sakinlərinin bizim rus ənənələrimizə necə mehriban münasibət bəslədiyini görürük. Biz də öz növbəmizdə bizi tam olaraq tək bir xalqa çevirən multikulturalizm və tolerantlıq təşəbbüslərini dəstəkləyirik”, - deyə Arximandrit Aleksi fikrini yekunlaşdırıb.

Milad gecəsi Arximandrit Aleksi Müqəddəs Mürdaşıyan Zənənlər Kafedral Kilsəsində ilahi liturgiya keçirib.

Kafedral ruhaniləri də mərasimdə iştirak ediblər.