Mədəniyyət xalqları birləşdirən körpüdür. Qarşılıqlı mədəni tanışlıq siyasi, iqtisadi və ticarət əlaqələrinin inkişafı üçün də zəmin yaradır.

Bu fikirləri AZƏRTAC-a müsahibəsində Argentinanın Azərbaycandakı səfiri Marianxeles Belluşi söyləyib. “Baku Tango Marathon 2026” proqramının ikinci günündə iştirak edən diplomat Azərbaycan və Argentina xalqları arasında oxşar cəhətlərdən danışaraq insanların səmimiyyətini və istiqanlılığını xüsusi vurğulayıb. Bildirib ki, Azərbaycana gəldikdə ilk hiss etdiyi məhz insanların argentinalılara bənzəyən bu xüsusiyyətləri olub.

Səfir azərbaycanlı musiqiçilərin Argentina tanqosunu ifa etmələrini iki ölkənin mədəniyyətləri arasında yaxınlığın gözəl nümunəsi kimi qiymətləndirib: “Azərbaycanlı sənətçilərin tarda Pyatsollanın əsərlərini ifa etmələri ilə bağlı çox gözəl təcrübəmiz olub. Azərbaycanın milli musiqi alətində Argentina musiqisini dinləmək möhtəşəm idi”.

Belə görüşlərin xalqların yaxınlaşmasındakı roluna toxunan diplomat mədəniyyətin başqa bir ölkənin həyatını, insanların xüsusiyyətlərini və adət-ənənələrini tanımağa imkan verdiyini qeyd edib.

“Mən həmişə deyirəm ki, mədəniyyət xalqları birləşdirən körpüdür. Bu körpü vasitəsilə iki xalq arasında yaranan yaxınlıq sonradan siyasi, iqtisadi və ticarət sahələrində əlaqələrin inkişafına yol açır. Hər şey bir-birimizi tanımaqdan başlayır. Buna görə də hesab edirəm ki, səfirliyin fəaliyyətinin ən mühüm istiqamətlərindən biri qarşılıqlı mədəni tanışlığın təməlini qoymaqdır”, – deyə səfir bildirib.

Argentina mədəniyyətinin Azərbaycanda təqdim etmək istədiyi digər sahələrindən danışan diplomat kino sənətini xüsusi qeyd edib. Onun sözlərinə görə, kino başqa bir ölkədə gündəlik həyatın necə olduğunu görmək üçün bir pəncərədir.

Səfir, həmçinin argentinalı sənətkar Marta Minuxinin yaradıcılığını Azərbaycan ictimaiyyətinə təqdim etmək arzusunu ifadə edib. O, Buenos-Ayres Latın Amerikası İncəsənəti Muzeyinin kolleksiyasından əsərlərin Heydər Əliyev Mərkəzində nümayişini də görmək istədiyini bildirib. Diplomat muzeyin zəngin Latın Amerikası incəsənəti kolleksiyasına malik olduğunu və müxtəlif ölkələrdə sərgilər təşkil etdiyini diqqətə çatdırıb.

Qeyd edək ki, oktyabrın 10-da marafon çərçivəsində müxtəlif ölkələrdən gələn rəqqaslar və tanqo həvəskarları növbəti rəqs gecəsində bir araya gəliblər. Argentina tanqosunun musiqi sədaları altında cütlüklərin rəqsləri gecəyə xüsusi ab-hava bəxş edib.

Argentinanın Azərbaycandakı səfirliyinin dəstəyi ilə keçirilən marafon oktyabrın 12-dək davam edəcək.