Türk Dövlətləri Təşkilatının (TDT) baş katibi Kubanıçbek Ömüralıyev Brüsseldə keçirilən Qlobal Turizm Forumunun illik toplantısında “2024 Dünya Turizm Lideri” mükafatına layıq görülüb.

Bu barədə AZƏRTAC-a TDT-dən məlumat verilib.

“Dünya Turizm Lideri” mükafatına qlobal turizm sənayesinə əhəmiyyətli və davamlı töhfələr vermiş şəxslər layiq görülürlər. Bu mükafat Kubanıçbek Ömüralıyevin fəal rolunu üzə çıxarmaqla yanaşı, türk dövlətlərinin turizm sahəsində birgə səylərini vurğulayır. TDT-yə üzv dövlətlər birgə təşəbbüslər vasitəsilə beynəlxalq miqyasda diqqətəlayiq, davamlı, inklüziv və mədəni cəhətdən güclü turizm təcrübələrinin yaradılmasında mühüm irəliləyiş əldə ediblər.

Türk dövlətləri TDT-nin strateji çərçivəsini rəhbər tutaraq, əlaqələri genişləndirən, mədəni irsi təşviq edən və turizm vasitəsilə iqtisadi artımı dəstəkləyən layihələr həyata keçirirlər. Qeyd edək ki, “Türk İpək Yolu” layihəsi bu əməkdaşlığı birləşdirmək üçün birgə səylərdəndir. Xüsusi rəqəmsal platforma olan www.turkicsilkroad.com tərəfindən dəstəklənən layihə səyahətçilərə regionun zəngin mədəni və tarixi irsi ilə fasiləsiz səyahət təklif edir. Habelə “Tabarruk Ziyarat” layihəsi türk dövlətlərində müqəddəs və mənəvi əhəmiyyət kəsb edən yerlərə ziyarətləri təşviq edir.

Digər innovativ təşəbbüs isə 2021-ci ildən həyata keçirilən “Türk Dünyası Turizm Paytaxtı” proqramıdır. Bu proqram hər il bir üzv şəhəri mədəni tədbirlərə, konfranslara və festivallara ev sahibi təyin edir. Kokand (2022), Şamaxı (2023) və Türküstan (2024) şəhərləri bu proqram çərçivəsində turizm paytaxtları olublar. Qırğızıstanın Cəlal-Abad şəhəri isə 2025-ci il üçün “Türk dünyasının turizm paytaxtı” elan edilib.

K.Ömurəliyevin fəaliyyəti dövründə irəli sürülən əsas təşəbbüslər arasında 1000-dən çox turizm mütəxəssisi üçün peşə hazırlığı proqramları, xidmət keyfiyyətinin yaxşılaşdırılması üçün potensialın artırılması seminarları, davamlı təcrübələri təşviq edən ekoturizm layihələri də yer alır.