Şəhidlik uca bir zirvə olmaqla yanaşı, həm də bir məktəbdir. Elə bir məktəb ki bugünkü nəsil o məktəbdən igidliyi, mərdliyi, cəsurluğu, Vətən uğrunda candan keçməyin nə olduğunu öyrən. Hər dəfə şəhid məzarlarını ziyarət edərkən şəhidlik adlı zirvənin əlçatmaz olduğu qədər də qürurverici bir məqam olduğunu dərk edirlər. Həyatda ən böyük xoşbəxtlik də elə Vətən yolunda şəhid olmaqdır. Lakin hər bir insana da şəhid olmaq, o əlçatmaz zirvəyə ucalmaq nəsib olmur… Bu gün bizim qürur mənbəyimizə çevrilən şəhidlərimizlə kiçik yaşlı uşaqlarımız, məktəblilərimiz və eləcə də bütövlükdə Azərbaycan fəxr edir. Bu gün hər bir vətəndaş "Bu Vətən bizimdir!” deyib canından keçən igid və mərd oğullarını yaxından tanımalı, onların əziz xatirələrini yad etməlidirlər. Şəhidlərimiz hər an bizim qəlbimizdədir, onlar ürəklərdə yaşayıb, yaşayır və yaşayacaq!. Unutmayaq ki, şəhidlərimiz bizim ən ali qürur mənbəyimizdir!

Vətənpərvərlik hissi, döyüş ruhu Bakı şəhərindəki 296 saylı orta məktəbin şagirdlərində də hər zaman yüksək səviyyədə olub və bu, bundan sonra da belə olacaqdır. Elə bu günlərdə - Böyük Qələbəmizin qeyd ediləcəyi ərəfədə həmin məktəbin ingilis dili müəllimi, həm də təşkilatçı müəllimlərindən biri Səda Mustafayevanın rəhbərliyi altında bir qrup məktəbli “Kobra” rəqəbli zabit, müasir artilleriyanın səriştəli rəhbəri olmuş, həm Birinci Qarabağ müharibəsinin, həm də İkinci Qarabağ müharibəsinin iştirakçısı, sonuncuda isə qəhrəmanlıq göstərmiş, şərəfli Şəhid adını daşıyan Xeyrulla Mais oğlu İbrahimovun İkinci Şəhidlər xiyabanındakı məzarı üstünə gəlməsi, onu, eləcə də burada uyuyan şəhidlərimizi ziyarət etməsi vətənpərvərliyin bariz nümunəsidir.
Ümumiyyətlə, bu məktəbdə Vətənə məhəbbət, vətənpərvərlik ruhu yüksək səviyyədə aşılanır, hər iki Qarabağ müharibəsində şəhid olmuş Vətən övladları xoş xatirələrlə yada salınır. Bu istiqamətdə Səda Mustafayeva kimi müəllimlərin rolu danılmazdır.
Bildiyimiz kimi, Xeyrulla Mais oğlu İbrahimov həm Birinci, həm də İkinci Qarabağ müharibəsində layiqincə iştirak edib, qəhrəman oğullarımızdan biri kimi hünərini göstərib, əslən basqallı olan bu zabitimiz - “Kobra” rəqəbli artilleriyaçı – polkovnik-leytenantımız şəhis olsa da, böyük Zəfərli Qələbəmizi görə bilmədi.

X.İbrahimov haqqında söz açarkən bu faktlardan yan keçmək olmur. O, 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsi zamanı Cəbrayılın, Füzulinin, Zəngilanın, Qubadlının və Xocavəndin azadlığı uğrunda gedən döyüşlərdə savaşıb, Ermənistan Silahlı Qüvvələrinin canlı qüvvələrinin, dayan məntəqələrinin məhv edilməsi zamanı fərqlənib. Ermənistan Ordusunun rəhbərliyi döyüş meydanında "Kobra" ləqəbi ilə tanınan Xeyrulla İbrahimovun öldürülməsinə pul ödənişi belə təyin etmişdi. O, oktyabrın 26-da Hadrutun azad edilməsi zamanı şəhid oldu. II Şəhidlər Xiyabanında dəfn edildi.
Xeyrullanın göstərdiyi şücaət bir daha bizə göstərir ki, azərbaycanlı gənclər Vətən sevgisini yalnız dildə deyil, əməlləri ilə də nümayiş etdirirlər. Ümumiyyətlə, X.İbrahimov da, digər gənclər də torpaqlarımızın qorunması, vətənimizin müdafiəsi uğrunda canından, qanından keçərək şəhidlik zirvəsinə ucalmağı özünə şərəf sayıblar.
Şəhidliyi özlərinə ömür payı biçən bu cür Vətən oğullarının, şəhidlərimizin döyüş yolları, göstərdikləri şücaət isə hər bir gəncə örnəkdir. Hər bir Azərbaycan vətəndaşı öz Milli qəhrəmanlarını, şəhidlərini tanımalı və tanıtmalıdır. Şəhidlərimizi yad etmək hər birimizin ən müqəddəs borcu olmalıdır. Qazaxda Vətən torpaqlarının azadlığı uğrunda canından keçmiş şəhidlərimizin xatirəsi hər zaman uca tutulur. Yuxarıda qeyd etdiyim kimi, Bakı şəhərindəki 296 saylı orta məktəb də Vətənin müstəqilliyi və ərazi bütövlüyü naminə canından keçən şəhidlərimizə, onların ailə üzvlərinə olan qayğı hər zaman diqqət mərkəzində saxlanılır.

Daşdəmir ƏJDƏROĞLU