ABŞ prezidenti Co Bayden İrana qarşı birtərəfli sanksiyaları nəzərdə tutan fövqəladə vəziyyətin bir il müddətinə uzadılması ilə bağlı qərar qəbul edib.

Turaztv.az APA-ya istinadən xəbər verir ki, bu barədə Ağ Evin mətbuat xidmətinin yaydığı bəyanatda deyilir.

“Baydenin vurğuladığı kimi, ABŞ İranla münasibətləri hələ də normallaşdırılmayıb və 19 yanvar 1981-ci il tarixli ikitərəfli razılaşmaların icrası prosesi davam edir”, - deyə bəyanatda bildirilir.

Qeyd edək ki, söhbət ABŞ və İran arasında Əlcəzair razılaşmasından gedir. Razılaşma 1979-cu il inqilabından sonra Tehranda bir ildən çox girovluqda qalan amerikalı diplomatların azad edilməsinə səbəb olub. Bu sənədlər, xüsusilə, ölkələrin bir-birinin daxili işlərinə qarışmaması prinsipini müəyyən edir.

“Bu səbəblə 1979-cu il noyabrın 14-də elan edilmiş milli fövqəladə vəziyyət, eləcə də bu fövqəladə vəziyyətə qarşı mübarizə üçün o zaman tətbiq edilmiş tədbirlər 2024-cü il noyabrın 14-dən sonra da qüvvədə qalmalıdır”, - bəyanatda deyilir.

Daha sonra Baydenin "İranla bağlı milli fövqəladə vəziyyətin müddətini bir il müddətinə uzadıram" dediyi bildirilib.

Qeyd edək ki, 14 noyabr 1979-cu ildə ABŞ-ın 39-cu prezidenti Cimmi Karter Tehranda amerikalıların girov götürülməsinə cavab olaraq 12170 saylı fərman imzalayıb.

Fərmanla ABŞ Maliyyə Nazirliyinə İranın ABŞ-dakı bütün rəsmi holdinqlərini, o cümlədən ABŞ banklarındakı hesabları və onların xarici şöbə və filiallarını bloklamaq əmri verilib.

Beləliklə 1980-ci il aprelin 7-də Karter Tehranla diplomatik əlaqələri kəsdi və ABŞ-dan İrana bütün malların, o cümlədən ərzaq və dərmanların ixracını qadağan etdi. Daha sonra İrandan ABŞ-a hər hansı mal idxalına embarqo və amerikalıların İrana səfərinə qadağa qoyuldu.