Ölümsüz qəhrəman,ölümsüz sevgi..

Xəbərlər

28.07.2024, 22:09

Ölümsüz qəhrəman,ölümsüz sevgi.. - FOTO

(Azərbaycan Bayrağı Ordenli, igid döyüşçü, cəsur kəşfiyyatçı, Bərdə hərbi batalyonunun qərargah rəisi Sərhəd Zöhrabbəyova və onun fədakar qadını Qarabağ Müharibə Əlilləri , Veteranları və Şəhid Ailələri İctimai Birliyinin Bərdə Rayon Şöbəsinin Sədri Etibar xanıma həsr olunur)

Bir qadın dayanıb məzar başında,
Bir şəhid vüqarla baxır üzünə.
Məhəbbət tökülür baxışlarından,
Bir heykəl qurulub eşqin özünə.

Onsuz keçirdiyi bu neçə illər,
İlişib qalıbdır kiprik , başında.
Məzara gül çiçək əkib övladı,
Ürəyi qocalıb cavan yaşında.

Ömür- gün yoldaşın baxır şəkildən,
Sənin gözlərində görür özünü.
Budur baş leytenant, cəsur komandir,
Sevir gözlərində olan dözümü.

Hər insan ömrünün yükünü çəkər,
Neçə ömürlərdən keçdin komandir.
Vətən torpağında cəsarətinlə
Şəhadət şərbətin içdin komandir.

İgid oğullarla çiyin- çiyinə,
Yağı, düşmənlərin əzdin başını.
Son nəfəsə qədər vuruşan igid,
Vətən qədər sevdin Vətən daşını.

Sevgisi müqəddəs, ümid içində,
Bir qadın yolunu gözlədi sənin.
Bir qadın, bir ana Etibar xanım,
Şəhid, mərd qızıdır ana Vətənin.

Ağdərə yolları daşmı, kəsəkmi,
Ölümsüz qəhrəman heç unudulmaz.
Gələn nəsillərdir aldı qanını,
Şəhidlər ölməzdir, qan yerdə qalmaz.

Sevgisi çox uca, adı kimi mərd,
Həyat yoldaşının qəlbindəsən sən.
Sərhədin sevdiyi möhtəşəm qadın
Nə qədər yaralı qəlbə məlhəmsən.

Daşı da göyərdər şəhidin qanı,
Torpaq oğulların unutmayacaq.
Başını uca tut şəhid qadını,
Könlünü qəm- qüssə ovutmayacaq.

Qardaş, ata oldu neçə oğula,
Kimsə yaralandı yandı ürəyi.
Kimsə şəhid oldu qolları üstdə,
Qisasçün pələngə döndü ürəyi.

Sərhəd tək oğullar heç unudulmaz,
Onlar el- obanın məhək daşıdır.
Oğullar torpaqda Vətən olurlar,
Ruhumuzu Vətən eşqi yaşadır.

Düşmənlərə meydan oxuyan igid,
Hər an könüllərdə qalacaq adın.
Sevgini, Vətəni sevən qəhrəman,
Gəncliyə örnəkdir sənin həyatın.