Dünyanın üzləşdiyi ən böyük problemlərdən birindən - iqlim dəyişikliyi və bütün ölkələrin üzləşdiyi fəsadlardan söhbət gedirsə, COP29 vacib hadisədir.

Turaztv.az APA-ya istinadən xəbər verir ki, bunu Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Braziliyanın “Correio Braziliense” qəzetinə müsahibəsində deyib.

"COP29 kimi nüfuzlu tədbirin keçirilməsi eyni zamanda iqlim məsələlərində daxili məlumatlılığın artırılmasına kömək edən böyük bir məsuliyyətdir. Ölkəmiz təbii qaz və neft kəşfiyyatına əsaslanan iqtisadiyyatı olan karbohidrogen ölkəsi kimi tanındığından, bir neçə ildir ki, hökumətimizin strateji hədəflərindən biri olan yaşıl və bərpa olunan enerjiyə keçidi təmin etməli olduğumuzu başa düşdük", - o deyib.

Prezidentin nümayəndəsi həmçinin qeyd edib ki, Azərbaycan Braziliya ilə ticarət əlaqələrini gücləndirməyə çalışır.

"Braziliya, məsələn, iqtisadiyyatımız üçün çox vacib olan gübrə sahəsində Azərbaycandan idxalı artıra bilər. Aviasiya sənayesində də çox yaxşı əlaqələrimiz var, çünki çoxlu sayda təyyarə alırıq. Həm də turist sayının artmasını istəyirik, çünki ölkənizi tanıtmağın ən yaxşı yolu birbaşa uçuşdur və dayanacaqları mümkün qədər qısa etmək üçün çalışmalı olduğumuz şey budur", - Elçin Əmirbəyov vurğulayıb.

E.Əmirbəyov həmçinin Azərbaycan-Ermənistan münasibətlərində gələcəkdə atılacaq addımlara da toxunub.

"Gələcək addımlar aydındır, çünki biz indi Azərbaycan tərəfindən hazırlanmış və il yarım əvvəl Ermənistana təqdim edilmiş sülh sazişinin mətni üzrə danışıqlar prosesindəyik. Bu mətn üzərində artıq mühüm işlər görülüb, lakin hələ də həll edilməli olan bəzi məsələlər var. İnanırıq ki, yaxın aylarda bu işi başa çatdırmaq üçün mümkün olan hər şeyi edəcəyik, çünki razılaşmanın qarşıdakı illərdə və onilliklərdə iki ölkənin dinc yanaşı yaşaması üçün mühüm kontekst yaradacağına inanırıq. Bu düşmənçiliyə birdəfəlik son qoymaq üçün əla fürsət var", - Azərbaycan Prezidentinin xüsusi tapşırıqlar üzrə nümayəndəsi əlavə edib.