Sentyabrın 28–29-da Yekaterinburqda onlayn formatda “Psixiatriya və narkologiyada innovativ texnologiyalar: diaqnostika, müalicə, reabilitasiya və yardımın təşkili” mövzusunda beynəlxalq elmi-praktiki konfrans keçirilib.

AZƏRTAC MDB-nin İcraiyyə Komitəsinin mətbuat xidmətinə istinadla xəbər verir ki, konfransın iştirakçıları müasir innovasiyalar nəzərə alınmaqla psixiatrik və narkoloji yardımın göstərilməsində təşkilati-hüquqi aspektləri, psixiki və davranış, o cümlədən psixoaktiv maddələrin qəbulu ilə bağlı pozuntuları olan şəxslərin müalicəsi və reabilitasiyasında fərdiləşdirilmiş tibbin prinsipləri və yanaşmalarını bölüşüblər. Həmçinin streslə bağlı olan fövqəladə hallar və pozuntular vaxtı psixoloji-psixiatrik yardımın təşkili, psixiatriya və narkologiya sahəsində peşəkar təhsilin perspektivləri, psixi sağlamlığın qorunması sahəsində rəqəmsal texnologiyaların tətbiqi məsələləri üzrə məruzələr təqdim olunub.

Konfrans çərçivəsində MDB-nin iştirakçısı olan dövlətlərin aidiyyəti qurumlarının psixiatriya və narkologiya sahəsində İctimai şurasının iclası keçirilib.

İctimai şuranın üzvləri fövqəladə hallarda psixi və sosial-psixoloji fəsadların profilaktikası, intiharların profilaktikası, psixiki və narkoloji pozuntu hallarının azaldılması üzrə baza təşkilatının işçi qruplarının fəaliyyətinin nəticələrini, “Psixi sağlamlığın mühafizəsi məsələləri” jurnalının formalaşması və nəşrinin dövriliyi məsələlərini müzakirə edib, eləcə də Şuranın MDB səhiyyəsi sahəsində əməkdaşlıq üzrə növbəti iclasının gündəliyinə daxil etmək üçün təklifləri formalaşdırıblar.

Tədbirlərdə Azərbaycan, Ermənistan, Belarus, Qazaxıstan, Qırğızıstan, Rusiya, Tacikistan, Özbəkistan və MDB-nin İcraiyyə Komitəsinin nümayəndələri iştirak ediblər.