Pentaqon sentyabrda ABŞ-də ukraynalı pilotlara “F-16” qırıcılarını idarə etmək üçün təlim keçməyə başlamaq niyyətində olduğunu açıqlayıb.

Turaztv.az AZƏRTAC-a istinadən xəbər verir ki, bu barədə “The New York Times” ABŞ hakimiyyətinin adının açıqlanmayan nümayəndəsinə istinadən məlumat yayıb.

“Pentaqonda gələn ay ABŞ-də ukraynalı pilotlara “F-16” qırıcıları üzərində təlim keçmək planlaşdırılır”, - deyə qəzet yazır.

Mənbə qeyd edib ki, pilotlar əvvəlcə Texasda ingilis dili təlimi keçəcək, sonra Arizonada aylarla uçuş hazırlığına başlayacaqlar.

Ötən həftə ABŞ Prezidentinin milli təhlükəsizlik üzrə müşaviri Ceyk Sallivan bildirib ki, ABŞ ukraynalı pilotların təlimindən sonra “F-16”ların üçüncü ölkələrdən Ukraynaya verilməsini təsdiqləməyə hazırdır.

Xatırladaq ki, cümə axşamı Norveçin Baş naziri Jonas Gahr Store Oslonun Ukraynaya “F-16” qırıcıları göndərmək planlarını açıqlayıb. Bundan əvvəl Hollandiya və Danimarka artıq Ukrayna hərbçilərini “F-16”larla təchiz etməyə söz vermişdilər.