Ağ ev administrasiyası ABŞ-ın Puerto-Rikoda yerləşən köhnə hərbi-dəniz bazasını ukraynalı pilotların F-16 qırıcıları üzrə təlimlərində istifadə etməyi planlaşdırır.

AZƏRTAC Prensa Latina agentliyinə istinadla xəbər verir ki, bir neçə həftə əvvəl adanın şimal-şərqində yerləşən Seyba şəhərindəki Ruzvelt-Rouds hərbi-dəniz bazasında keçirilən iclasda ukraynalı pilotların burada təlim keçəcəyi açıqlanıb. Bazanın fəaliyyəti 2004-cü ildə dayandırılsa da, Vaşinqton ondan istifadə hüququnu özündə saxlayır.

Bir müddət öncə Ukrayna Prezidenti Volodimir Zelenski avqust ayında ukraynalı pilotların F-16 təyyarələrində təliminin başlayacağına ümidini ifadə etmişdi.

CNN telekanalı ABŞ administrasiyasının vəzifəli şəxslərinə istinadla yaydığı məlumata görə, Vaşinqton Ukrayna hərbçilərinin F-16 qırıcılarında təlim keçməsi barədə Avropa ölkələrindən plan almayıb. Ağ ev təlim proqramında hansı ölkələrin iştirak edəcəyini hələ də dəqiq bilmir.

Qeyd edək ki, Ağ evin Milli Təhlükəsizlik Şurasının strateji kommunikasiyalar üzrə əlaqələndiricisi Con Kirbi cari ilin sonunadək ABŞ-ın Kiyevə F-16 təyyarələri vermək niyyətində olduğunu bildirmişdi.