SÜBHAN KAMALOĞLU: ELƏ DARIXMIŞAM SƏNİNÇÜN,ANA

Xəbərlər

30.07.2023, 22:44

SÜBHAN KAMALOĞLU: ELƏ DARIXMIŞAM SƏNİNÇÜN,ANA - FOTO

ELƏ DARIXMIŞAM SƏNİNÇÜN, ANA

Gözümdən düşübdür hər şey dünyada,
Elə darıxmışam səninçün,Ana.
Sanki tək qalmışam,tənha Adada,
Elə darıxmışam səninçün,Ana.

Ayrı düşdük,qaldım səndən uzaqda,
Əhvalın necədir,məndən uzaqda?
Özüm Bakıdayam, ruhum Qazaxda,
Elə darıxmışam səninçün,Ana.

Həyətdə əkdiyin güllərin üçün,
Arxamca su səpən əllərin üçün,
Dən düşmüş,ağaran tellərin üçün,
Elə darıxmışam səninçün,Ana.

Sır-sıra bağlayan sazaq kimiyəm,
Əyilmiş, qurumuş budaq kimiyəm,
Sübhanam,körpəcə uşaq kimiyəm,
Elə darıxmışam səninçün,Ana.

ANA

Səni axtarıram mən gecə-gündüz,
Sən yoxsan,bu dünya boşalıb,Ana.
İndi ümid yerim məzarıstanda,
O şəklin boylanan daş olub,Ana.

Necə gözəliydi analı günlər,
Bir-birindən şirin,mənalı günlər,
Dəyişik düşübdür indi fəsillər,
Çiçəkli baharım qış olub,Ana.

Qalmayıb obaya, elə həvəsim,
Keçmir ürəyimdən kəndə tələsim,
Sübhanam, soyuyub isti nəfəsim,
Həsrətin gözümdə yaş olub,Ana.

YIXILMADIM

Zamanla əzdilər, əzdilər məni,
Yenə yıxılmadım,ayaqda durdum.
Mənə qəsd eləyən o alçaqların,
Tutdum yaxasından,başından vurdum.

Dönmədim yolumdan,irəli baxdım,
Canımı min oda,alova yaxdım.
Doldum bulud kimi,sel olub,axdım,
Arzuyla yaşadım,xəyallar qurdum.

Gör nələr çəkmədi bəlalı başım,
Necə xatırlayım,necə danışım?
Düşündüm, həyatla gərək barışım,
Şükrilə oturum, Şükrilə durum.

Nələrə qadirdir, nələrə insan,
Yaxşını, yamanı görür Yaradan.
Sübhana yar oldu Qadiri Sübhan,
Bir də öz Qazağım,öz Ana Yurdum...

GƏRƏK OLSUN

İgid igid olmaz ha əlləşsə də,
Onun arxasında el gərək olsun.
Tərlan çaynağından bilinər,qağa,
Ona yaşamağa çöl gərək olsun.

Bir bülbül bağçaya, deyərdim azdır,
Bir çiçək açıbsa,söyləmə yazdır.
Namərd hal soruşsa,de kefim sazdır,
Hər bir kəsə uyğun dil gərək olsun.

İnan, gərək haqqı deyən pir ola,
Kişinin üzüylə sözü bir ola.
Ozanın üzündə gərək nur ola,
Ay Sübhan,sözün də ləl gərək olsun.