SÜBHAN KAMALOĞLU: Olmaz - Olmaz

Xəbərlər

23.07.2023, 23:43

SÜBHAN KAMALOĞLU: Olmaz - Olmaz - FOTO

OLMAZ-OLMAZ

Hər kim yaxşı deyə dönüb yamana,
Dünyada işləri bay olmaz-olmaz.
İlan da sürünüb, çıxar zirvəyə,
Zirvədə qartala tay olmaz-olmaz.

Bir xalqınki, şahı əlacsız matdı,
Fatihəsin verin – gəmisi batdı...
Bir övladki, ata-anasın atdı,
Ona yardandan pay olmaz-olmaz.

Sübhanın sözləri getməsin hədər,
Bilənlər anlayar, anlayan bilər,
Cümlə kainatı Günəş isidər,
Min ulduz birləşsə Ay olmaz-olmaz.

HEÇ VAXT

O yerdə ki, böyük-kiçik bilinmir,
Elə yerdə gəzib, dolaşma heç vaxt.
Əqidəsin boğazına satanla,
Dost olub,çirkaba bulaşma heç vaxt.

Hər yetən adamda etibar olmaz,
Zatı naxələfdə düz ilqar olmaz.
Fərsizdə nə səxa, nə də var olmaz,
Əbəsdir,nadanla çarpışma heçvaxt.

Yollarda yorular yolunu azan,
Çalış hörmət eylə, sən hörmət qazan.
Nə yalan danışma, nə olsun yozan,
Sübhan,beləsinə qarışma heç vaxt.

AY OĞUL

Məclisə varanda ayaqda əyləş,
Çalışma çıxasan başa, ay oğul.
Qarşında düşmən də olsa düz danış,
Bax onda gələrsən xoşa,ay oğul.

Harda həqiqət var, sən ora baş qoy,
Göz üstən qaş salma, göz üstə qaş qoy.
Bircə ev də yıxma, daş üstə daş qoy,
Qoy oxundəyməsin daşa,ay oğul.

Yolaç,körpülər sal,gen yolu kəsmə,
Tərif eyləsələr,kükrəyi bəsmə.
Nə bəxtdən,nədəki,taledən küsmə,
Həyatda ləkəsiz yaşa,ay oğul.

Eşitsən Sübhanı, can atma vara,
Vara can atanlar qalar avara.
Oxu sözlərimi, mənasın ara,
Sözlərim getməsin boşa,ay oğul.

DEYNƏN

Qəlbi təmiz, ürəyi pak, saf niyyət,
Bir gözələ ölüm qıyarmı–deynən.
Adam bilə-bilə öz balasını,
Düşmən ümidinə qoyarmı–deynən.

Arzumdur–hər yerə yollar çəkilsin,
Yollar kənarında güllər əkilsin.
Yar gələn yollara gözüm dikilsin,
Yar da öz yarından doyarmı–deynən.

Haram olsun düzü tərsə yozana,
Sübhan minnətdardır yazı yazana.
Əlim çatmır nə saza, nə ozana,
İnsan sir sözünüyayarmı–deynən.

ÇOXDUR

İnsan tanıyıram yatmır beş saat,
Gecəli-gündüzlü yatanlar çoxdur.
Adam var qolundan tut kənara at,
Üzünə pərdələr tutanlar çoxdur.

Kişi gərək qorusun öz yurdunu,
İgid oğul bada verməz ordunu.
"Öldürməkçün gözlərinin qurdunu",
Dostunu düşmənə satanlar çoxdur.

Sübhan,hardan gəlir keçməkeşli yol,
Onu bilən bilər,nədir–olma,ol...
Dünya bir dəryadır, üzənləri bol,
Di gəl,üzənlərdən batanlar çoxdur.

YOXDUR

Necə sevim şəhəri mən,
Qış qurtardı,qarı yoxdur.
Gecə-gündüz külək əsir,
Bir ağacın barı yoxdur.

Bəslənsə də əncir, üzüm,
Qum ələyir,görmür gözüm.
Sənə yoxdur daha sözüm,
Bağ-bağçanın narı yoxdur.

Bu yerdə gözəllik hanı,
Varmı maralı, ceyranı?
Sən düz anla gəl Sübhanı,
Ocaq yanır,qoru yoxdur.