SÜBHAN KAMALOĞLU: ŞEİRLƏR - FOTO

Xəbərlər

17.07.2023, 22:07

SÜBHAN KAMALOĞLU: ŞEİRLƏR - FOTO

GÖRMÜŞƏM

Soruşma yaşımı, yaş o yaş deyil,
Vədəsiz ağaran tellər görmüşəm.
İçimdə çəkmişəm dərd ilə qəmi,
Aylar aşırmışam,illər görmüşəm.

Bilmədim oyunlar oynanır harda,
Harda çətinlik var, mən oldum orda.
Yağıbdı başıma yağış da, qar da,
Daşqınlar görmüşəm,sellər görmüşəm.

Eşqin şərbətini içə bilmədim,
Gülə heyfim gəldi, biçə bilmədim.
Sübhanamhəddimi keçə bilmədim,
Keçilməz obalar,ellər görmüşəm.

FƏLƏK

Neçə fitnə-fəsad, neçə felin var,
Məzlumun belini bükürsən,fələk.
Kiminin dağıdıb yurd-yavasını,
Kiminə saraylar tikirsən,fələk.

Zirvəyə qaldırıb çox haqsızları,
Günahkar bilirsən günahsızları.
Gölləri qurudub, quba-qazları,
Susuz səhralara çəkirsən,fələk.

Sənə deməyimmi sən daşürəksən?
–Görmədim bir kimsə deyə gərəksən.
Sübhan deyər, fələksən ki, fələksən,
Niyə nahaq qanlar tökürsən,fələk?!

FAYDASI OLMAZ

Nankor kəsə, nainsafa, zalıma,
Yaxşılıq etməyin faydası olmaz.
Nadanın, nakəsin yoluna çıxıb,
Dalınca getməyin faydası olmaz.

Kim pis əməllərə eyləsə adət,
Yüz yol danlasan da edəcək qələt.
Əyri boyunları ha çalış düzəlt,
Hayına yetməyin faydası olmaz.

Dillən, Kamaloğlu, el düzü görsün,
Gecəni sevənlər, gündüzü görsün.
Əkilən gül gərək gün üzü görsün,
Kölgədə bitməyin faydası olmaz.