Gənclər və İdman Nazirliyi, Azərbaycan Respublikası Gənclər Fondu, Ağ Şəhər Bazar Meydanın dəstəyi, Azərbaycan Tələbə Gənclər Təşkilatları İttifaqının (ATGTİ) təşkilatçılığı ilə “ConGRADs 2023!” adlı məzun şənliyi keçirilib.

Turaztv.az AZƏRTAC-a istinadən xəbər verir ki, şənliyin keçirilməsində əsas məqsəd bu il ali və orta ixtisas təhsil müəssisələrindən məzun olmuş tələbələri bir araya toplamaq, imtahanlardan sonra asudə vaxtlarının səmərəli keçirilməsini təmin etməkdir. Eləcə də onlar üçün stresdən kənar mühit formalaşdırmaq və şəbəkələşmə imkanı yaratmaq olub.

Üç mindən çox tələbənin iştirak etdiyi tədbirin rəsmi açılış mərasimində gənclər və idman nazirinin müavini İndira Hacıyeva, Gənclər Fondunun icraçı direktoru vəzifəsini icra edən Qədir Xəlilov və ATGTİ-nin sədri Pərviz Mirələmli çıxış edərək məzun olmuş gənclərə uğurlar arzulayıblar.

Tədbirin qeyri-rəsmi hissəsində məzun olmuş gənclərin əyləncəsi üçün təşkil olunmuş konsert proqramında PRoMete, Tomris, Nərmin Kərimbəyova, Tural Turan qardaşları, Fariz İlyas, Fərid Mərd və digər gənc müğənnilərin çıxışları olub.

Şənlik zamanı tələbələrin əyləncəsi üçün müxtəlif oyunlar, hədiyyəli viktorinalar və rəqslər təşkil edilib.