Mayın 12-də Bakı Gənclər Mərkəzində Gənclər və İdman Nazirliyinin və Gənclər Fondunun birgə təşkilatçılığı ilə Müasir Azərbaycan dövlətinin qurucusu, dahi şəxsiyyət və dövlət xadimi, Ümummilli Lider Heydər Əliyevin 100 illik yubileyi münasibətilə “Azərbaycan deyəndə” adlı Gənclər Konfransı keçirilib.

Turaztv.az AZƏRTAC -a istinadən xəbər verir ki, konfrans 3D formatında hazırlanan Azərbaycan xəritəsinə ölkəmizin hər bir bölgəsindən dəvət edilən gəncin gətirdiyi bir ovuc torpağı xəritəyə yerləşdirməsi ilə başlayıb.

300 gəncin iştirak etdiyi tədbirin rəsmi hissəsinin açılışı Azərbaycan Respublikasının Dövlət Himninin səsləndirilməsi və ölkəmizin ərazi bütövlüyü uğrunda canından keçən şəhidlərimizin xatirəsinin bir dəqiqəlik sükutla yad edilməsi ilə başlayıb.

Tədbirdə çıxış edən gənclər və idman nazirinin müavini İndira Hacıyeva və Gənclər Fondunun icraçı direktoru Fərid Cəfərov Ulu Öndərin ölkə gənclərinin problemlərinin həllində, onların cəmiyyət həyatında iştirakının təmin olunmasında, milli adət-ənənələrə, saf dəyərlərə bağlı yetişməsində dövlət səviyyəsində həyata keçirdiyi böyük siyasi fəaliyyətlər barədə bəhs edərək bugünkü müasir gəncliyimizin əldə etdiyi zəfər və uğurlara görə Ümummilli Liderin təməlini qoyduğu siyasi xəttə borclu olduğunu dilə gətirdilər.

Konfransda Ulu Öndər Heydər Əliyevin həyat və fəaliyyətindən bəhs edən film nümayiş edildikdən sonra Azərbaycan Milli Elmlər Akademiyasının Riyaziyyat və Mexanika İnstitutunun direktoru Misir Mərdanovla gənclərin görüşü olub.

Misir Mərdanov Ümummilli Liderlə olan xatirələrindən və onun Azərbaycan elminin, təhsilinin inkişafına verdiyi töhfələrdən bəhs edərək gənclərin suallarını cavablandırıb.

Gənclər Konfransının ikinci yarısında iştirakçılara dahi şəxsiyyət Heydər Əliyevin gənclərlə bağlı fikirlərinə əsaslanan İdeyaton tapşırığı verilərək, onların hazırladıqları ideya və təklif təqdimatları dinlənilib, uğurlu hesab edilən layihənin reallaşdırılması üçün dəstəyin göstərilməsi nəzərdə tutulub.