SÜBHAN KAMALOĞLUNUN ŞEİR ALƏMİ

Xəbərlər

18.07.2023, 22:32

SÜBHAN KAMALOĞLUNUN ŞEİR ALƏMİ - FOTO

ANALAR

Tufanda,çovğunda,qarda,boranda,
Balanın dalınca gələr analar.
Ya kədərin olsa, ya qəmin olsa,
Bir anda qəlbində bölər analar.

Oğluna həyandı, qızına sirdaş,
Bacı güman yeri,arxadı qardaş,
Balaları üçün tökər qanlı yaş,
Onlara xoşbəxtlik dilər analar.

Ananın başına dolanaq biz də,
Ananın yeri var ürəyimizdə,
Ananın haqqı var hər birimizdə,
Hər kəsin yerini bilər analar.

Yaranmış bir canlı anasız deyil,
Uca dağ olsan da, anaya əyil,
Ananın balası tək Sübhan deyil,
Nəvələri şirin-şəkər analar.

AYRI DÜŞMƏSİN

Arzum diləyimdir Qadir Allahım,
Bülbülü gülündən ayrı düşməsin.
Qartal zirvəsindən, sona gölündən,
Ceyranı çölündən ayrı düşməsin.

Zatı qırıq olan heç xoşa gəlməz,
İlhamı olmayan bil, coşa gəlməz.
Yalquzaq tək gəzər, o qoşa gəzməz,
Qurd da öz elindən ayrı düşməsin.

Sübhan çox gəzibdir düzü-dünyanı,
Anladım nadanı, könül duyanı,
Torağay yol sevər, kəklik qayanı,
Quba-qaz gölündən ayrı düşməsin.

DOYMARAM

Ömrüm boyu gecə-gündüz gəzsəm də,
Dağlardan kamımı alıb doymaram.
Suyu can dərmanı, havası məlhəm,
O yerlərdə qonaq qalıb doymaram.

Yamacları yenə qucaqlayıb qar,
Günəş çıxdı, qarda olmaz etibar.
Mənim o yerlərdə sözüm, sazım var,
Bir ömür sazımı çalıb doymaram.

Ümidlə həyatda yaşayır insan,
Fərmanı yerinə yetirir zaman.
Sübhan fəryad edib,deyir ay aman,
Dərin xəyallara dalıb doymaram.

OLMASIN

Mənim bu dünyada bir istəyim var,
Bülbülü bağçadan, güldən olmasın.
Yaylağa yaraşıq obadır, eldir,
Yaşılbaş sonalar göldən olmasın.

Nə zövq alarsan ki, xəzəlli bağdan,
Çürümüş meyvədən, qurumuş tağdan?
Ceyranı, cüyürü, maralı dağdan,
Turacı,kəkliyi çöldən olmasın.

Qoy axsın dağların buzbulaqları,
Artsın yurdumuzun sərvəti, varı.
Sübhanam, qoruyaq əhdi, ilqarı,
Elin şair oğlu eldən olmasın.

DAĞLAR

Yayda ellər köç eyləyər,
Bilinirmi sanı, dağlar?
Çox igidlər yola salıb,
Çoxda bəyi,xanı dağlar.

Sanki,bir-bir arayarsan,
Saçlarını darayarsan.
Hər bir kəsə yarayarsan,
Qurbanverrəm canı,dağlar.

Kimi gəlib abad eylər,
Kimi adın bərbad eylər.
Hərə bir cürə ad eylər,
Yaxşı-pisi tanı,dağlar.

Sübhan nə köhlənlər yordu,
Nişan alıb ovlar vurdu.
Qoşun-qoşun, ordu-ordu,
Nələr gördün fani,dağlar.

HƏSRƏTİNDƏYƏM

Yalçın qayalarda bitən,güllərin həsrətindəyəm.
Maralları yorğun düşən,çöllərin həsrətindəyəm.

İnsan var, hər dərdi duyan,İnsan var, yurd viran qoyan.
Min daş atsan bulanmayan,göllərin həsrətindəyəm.

Qartalları dağdan enən,daşlarında kəklik dinən.
Günü toy-bayrama dönən,illərin həsrətindəyəm.

Zirvələri fəth eyləyən,qərarını qət eyləyən.
Düz sözünü sərt eyləyən,dillərin həsrətindəyəm.

Sübhan düşüb çox aralı,qəlb olur hərdən yaralı.
Görəsən necədir halı?–Ellərin həsrətindəyəm.