“Azəristiliktəchizat” ASC istilik təchizatı sahəsində çoxillik təcrübəsinə və peşəkar heyətinə əsaslanaraq yaşayış binaları və sosial obyektlərdə binadaxili və mənzildaxili istilik sistemlərinin kommersiya şərtləri əsasında təmir və bərpa xidmətlərini təklif edir.

ASC-dən AZƏRTAC-a bildirilib ki, qurum tərəfindən binadaxili istilik sistemlərinin (qızdırıcı cihazlar, siyirtmələr, istilik boruları və s) təftişi, cari və ya əsaslı təmiri və yenidən qurulması, texnoloji ardıcıllığa əməl olunmasının yoxlanılması və mənzilin mövcud vəziyyətdə istiliklə təmin edilməyən digər sahələrin də isidilməsi üçün texniki həll yollarını müəyyən edilərək tövsiyələrin verilməsi həyata keçirilir.

Qeyd olunub ki, mənzildaxili istilik sistemlərinin, həmçinin yaşayış binalarında aşağı paylama istilik sistemlərinin təmiri, bərpası və dəyişdirilməsi peşəkar mütəxəssislərə həvalə edilir. İş və xidmətlər üçün qiymət xərclərin smetası və tərəflər arasında qarşılıqlı razılaşma əsasında müəyyən olunur.

Müraciətlərə əsasən, aidiyyəti İstilik Sistemləri İstismar Sahəsinin əməkdaşları obyektlərə baxış keçirərək, istilik mənbəyi, məhəllədaxili istilik xətləri və binadaxili istilik sistemləri haqqında ilkin qiymətləndirmə hesabatını hazırlayır, smeta xərclərini planlayır və tələb olunan mal-materialların siyahısının müəyyən edilməsində müştəriyə dəstək göstərir.

Mövcud qanunvericilik və normativ hüquqi aktlara əsasən (Azərbaycan Respublikasının Mülki Məcəlləsi, Azərbaycan Respublikasının Mənzil Məcəlləsi) binadaxili mühəndis kommunikasiyalarının, o cümlədən istilik sistemlərinin saxlanması, təmiri və bərpası balans saxlayıcıları və ya mənzil mülkiyyətçiləri tərəfindən həyata keçirilməlidir.