Quba rayonunun Digah kəndində inşa olunan 360 şagird yerlik, üçmərtəbəli məktəb binasında son tamamlama işləri aparılır.

AZƏRTAC-ın bölgə müxbiri xəbər verir ki, Fərhad Həmzəyev adına Digah kənd tam orta məktəbi üçün yeni binanın tikintisinə 2022-ci ilin aprel ayından başlanılıb.

Digah kəndindəki məktəbin köhnə binası 98 il öncə istifadəyə verilib. Yaşı bir əsrə bərabər binada tədris prosesini müasir dövrün tələblərinə uyğun təşkil etmək mümkün deyildi. İstismar müddətini başa vuran binanın yerinə müasir məktəb binası inşa olunub.

Hazırda binada son tamamlama və tərtibat işləri aparılır, məktəbin həyəti abadlaşdırılır. Müasir məktəb binasında sinif otaqları, laboratoriya, gənclərin çağırışaqədər hazırlığı, əmək təlimi və kompüter otaqları, idman və akt zalı, kitabxana və yeməkxana olacaq.

Digah kənd tam orta məktəbinin yeni binası növbəti tədris ilində istifadəyə veriləcək.