Türkiyədə prezident və parlament seçkiləri çərçivəsində ölkə daxilində səslərin təxminən 70 faizi sayılıb. Səslərin hesablanmasında gecikmə yoxdur.

Turaztv.az AZƏRTAC-a istinadən xəbər verir ki, bunu Türkiyə Yüksək Seçki Qurumunun sədri Ahmet Yener bildirib.

Xatırladaq ki, mayın 14-də Türkiyədə prezident və parlament seçkiləri ilə bağlı səsvermə başa çatıb. Hazırda seçki məntəqələrində səslər sayılır.

Seçkilər üzrə 64 milyon 113 min 941 nəfər seçici qeydə alınıb. Ölkə daxilindəki seçici sayı 60 milyon 697 min 843 nəfərdir. Xaricdə yaşayan 3 milyon 416 min 98 seçicinin səsverməsi bir neçə gün əvvəl yekunlaşıb.

Qeyd edək ki, prezident seçkilərinin ilk turunda namizədlərin heç biri 50 faizdən çox səs toplaya bilməsə, mayın 28-də səsvermənin ikinci turu keçiriləcək.

Həmçinin Türkiyə Böyük Millət Məclisinə 87 seçki dairəsində 600 millət vəkili seçiləcək. Seçkilərdə 24 partiya və 151 müstəqil namizəd iştirak edib.