Ümumdünya Səhiyyə Təşkilatı (ÜST) COVID-19 infeksiyasının geniş yayılmasının qarşısının alınması məqsədilə pandemiya başlayandan Azərbaycan Respublikası ilə yaxından əməkdaşlıq edir və birlikdə bir sıra layihələr həyata keçirir.

AZƏRTAC Səhiyyə Nazirliyinin mətbuat xidmətinə istinadla bildirir ki, əməkdaşlığın davamı olaraq, Səhiyyə Nazirliyinin təklif etdiyi ölkə üzrə Birgə Xarici Qiymətləndirmə ÜST tərəfindən həyata keçirilir.

Birgə Xarici Qiymətləndirmə ölkənin ictimai səhiyyə sahəsində beynəlxalq əhəmiyyət kəsb edən fövqəladə hallara qarşı hazırlıq səviyyəsinin müəyyən edilməsi, qiymətləndirilməsi, qarşısının alınması üçün lazım olan alətlərdən biridir. Birgə Xarici Qiymətləndirmənin məqsədi ölkədə fövqəladə hallara qarşı hazırlıq səviyyəsinin müəyyən edilməsi və hədəflərin əlçatanlığını ölçməkdir.

Birgə Xarici Qiymətləndirmədə Səhiyyə Nazirliyini İctimai səhiyyə və xəstəliklərə nəzarət şöbəsinin müdiri Nəzifə Mürsəlova təmsil edir.

Qeyd edilib ki, qiymətləndirmə mayın 5-dək davam edəcək.