“Şəhər toylarına da gedirik, rayon toylarına da. Şəhər toyları daha bahalıdır. Çünki rayonda insanlarda o qədər də imkan yoxdur, amma şəhərdə nə qədər istəsəniz pul verirlər. Rayonda bunu nəzərə almaq lazımdır. Bizi xalq dolandırır, onlardır bizi yaşadan. Mən aza da, çoxa da şükür etmişəm. Aza min bərəkət. Müğənnilər var ki, elə qiymətə toya gedirlər ki, mən ağlıma sıxışdıra bilmirəm. İnsanları başa düşürəm. Elə ailə olub, deyib ki, “imkanım yoxdur, amma çox istəyərəm ki, övladımın toyunda siz oxuyasınız”. Gedib təmənnasız oxumuşam. Elə müğənni var ki, ayda iki toyu olur, amma mənim ən azı ayda 25 toyum olur”.

Bunu Moderator.az-a açıqlamasında əməkdar artist Yusif Mustafayev deyib.

“Həyatdır, heç kim bilmir ki, ölüm onu harada yaxalayacaq. Kimin ağlına gələrdi ki, Tünzalə xanım (Toppuş bacı) bu tezliklə dünyasını dəyişəcək. Allah ona rəhmət etsin, inanıram ki, yeri cənnətdir. Mən də dəfələrlə ölümlə üz-üzə qalmışam, qurban olduğum məni saxlayıb. O vaxt toyda elektrik cərəyanı məni vurdu, 14 saat komada qaldım. Axşam saat 7-də bu hadisə baş vermişdi, səhəri gün saat 10-da ayılıb gördüm ki, atam və əmim başımın üstündə dayanıb. 14 saatda o biri dünyanın hər tərəfini görüb gəldim. Bilmirdim ki, cəhənnəmdir ya cənnət. 1 aydan sonra övladım olacaqdı, Allah bəlkə də məni övladıma görə sağ saxladı. Bir dəfə də ailəmlə Qubaya gedəndə avtomobil qəzasına düşdüm. Bu 19 il əvvəl olub. Qadın özünü maşının qabağına atmışdı. 2-3 dəqiqəlik kliniki ölüm keçirmişəm. Sənət dostlarım Elxan Şirinov və Baloğlan Əşrəfov mənə çətin günlərimdə arxa-dayaq durublar” deyə sənətkar bildirib.

Sənətkar həyatda çox sevdiyi anasının itkisindən də danışıb.

“Anamı artıq 4 ildir ki, itirmişəm. Heç kimə sirr deyil ki, mən onu nə qədər çox sevirdim. Həyat davam edir. Anamın iyini bacılarımdan, qızımdan alıram. 100 yaşın da olsa, əgər anan sağdırsa, sən özünü balaca hiss edirsən. Qohumlarım məni evdə, nəsildə ağsaqqal bilirlər” deyə sənətkar bildirib.

Əməkdar artist ailəsindən də danışıb.

“Deyirlər ki, gəminin kapitanı səriştəli olsa, Allahdan bəla gəlməyincə o gəmi qəzaya uğramaz. Hər şey böyükdən asılıdır. Biz özümüz evdə 10 bacı qardaş olmuşuq. Onların heç birini balalarımdan ayırmamışam. Özümün də 3 övladım, 8 nəvəm var. 5-10 manat qazansan belə, çalış onu tək yemə. Çalış ehtiyacı olanların hamısı ondan dadsın. İnsan da var ki, qazanıb, gizlədir, gizlətdikləri heç ona qismət olmur. Daim çörək arxasınca qaçmışam, bilməmişəm ki, balalarım necə böyüyüb. İndi bir az yaşlı vaxtımdır, evdə çox oluram. Babalıq dövrünü gözəl yaşayıram” deyə sənətkar bildirib.
Mənbə: moderator.az