QIZBƏS QƏBƏLƏ: QADIN SEVİNƏRSƏ, DÜNYA YAZ OLAR.

Xəbərlər

9.03.2023, 20:22

QIZBƏS QƏBƏLƏ: QADIN SEVİNƏRSƏ, DÜNYA YAZ OLAR. - FOTO

QADIN SEVİNƏRSƏ, DÜNYA YAZ OLAR.

Gəldi qadınların sevinc bayramı,
Güllər dəstə - dəstə evlərə gəldi.
Güldü fərəhindən sevindi hamı,
Gül gülün əlində hədiyyə oldu...

Qadın qadınlığın qürurun duydu,
Ana olduğuyçün ana öyündü.
Nə deyim...bu elə şirin duyğu ki,
Baxdım riqqətimdən qəlbim döyündü...

Nə daşı isinməz, nə divar qızar,
Evdə "qadın"- adlı ocaq olmasa.
O ev canlı qəbir, məzara bənzər,
Ora qadın - ana hənri dolmasa..

Yüz kişi yığılıb silə - süpürə,
Tay olmaz bir qadın səliqəsinə.
Dünyanın ən gözəl təranəsi də,
Əvəz ola bilməz qadın səsinə...

İnsan ömrü boyu səadət gəzir,
Bilmir ki, xoşbəxtlik öz evindədir.
Daima amadə, əmrə müntəzir,
Qadın ev - eşiyin qayğısın çəkir.

İşdə də nigaran oturur bəzən,
Gah evi düşünür, gah uşaqları,
Ağlını götürüb aparır bəzən,
Bitib tükənməyən ev qayğıları..

Ancaq nə yoruldum, usandım deməz,
Ona şirin gələr bu ağrı - acı,
Bircə tikəni də övladsız yeməz,
Oğluna qardaşdır, qızına bacı...