Qətərdə təşkil olunan futbol üzrə dünya çempionatında qrup mərhələsinin ikinci turunun oyunları davam edir.

Turaztv.az AZƏRTAC-a istinadən xəbər verir ki, günün üçüncü qarşılaşması G qrupunda Braziliya və İsveçrə milliləri arasında keçirilib. Görüş Braziliya yığmasının üstünlüyü şəraitində keçib. “Sambaçı”lar yalnız matçın 83-cü dəqiqəsində istəklərinə nail olublar, Kazemiro İsveçrə yığmasını məyus edib.

Bununla da Braziliya G qrupunda liderliyini möhkəmləndirərək pley-offa vəsiqəni təmin edib. İsveçrə isə 2 oyuna üç xal toplayaraq pley-off şanslarını saxlayıb.

Qeyd edək ki, bundan əvvəl Fransa da pley-offa vəsiqəni təmin etmişdi.

Dünya çempionatı ilk dəfədir Yaxın Şərqdə keçirilir. Qətər yarışa ev sahibliyi edən 18-ci ölkə kimi tarixə düşüb. Bu, həm də 32 komandanın iştirakı ilə baş tutan sonuncu çempionat olacaq. 2026-cı ildə ABŞ, Meksika və Kanadanın birgə təşkil edəcəyi mundialda isə 48 yığma mübarizə aparacaq.

Qətərin ev sahibliyi etdiyi mundial 29 gün davam edəcək. Dünya çempionatında ümumilikdə 64 qarşılaşma keçiriləcək. 32 komanda hərəsində 4 yığma olmaqla səkkiz qrupda mübarizə aparır.

Çempionluq uğrunda mübarizədə əvvəllər qalib olmuş 8 komandadan yeddisi iştirak edir. Braziliya, Almaniya, Argentina, Uruqvay, Fransa, İngiltərə və İspaniya yenə titul qazanmaq arzusundadır. Elə mundialın əsas favoritləri də onlardır. Uruqvay istisna olmaqla, digərləri qızıl medala namizədlər hesab olunur.