Avqustun 31-də Brüsseldə Avropa İttifaqı Şurasının prezidenti Şarl Mişelin təşəbbüsü ilə Azərbaycan və Ermənistan liderlərinin dördüncü görüşü keçirildi. Prezident İlham Əliyev ilə Ermənistanın baş naziri Nikol Paşinyan sonuncu dəfə bu ilin mayında Brüsseldə görüşmüşdülər. Bu danışıqların da əsas mövzusu Bakı ilə İrəvan arasında münasibətlərin normallaşdırılması idi. 4 saata yaxın davam edən görüşdən sonra Avropa İttifaqı Şurasının prezidenti Şarl Mişel mətbuata bəyanatla çıxış edib. Bəyanatda iki ölkə arasında sülh müqaviləsinin mətninin hazırlanması istiqamətində müəyyən addımların atılacağı xüsusi vurğulanıb.
Şarl Mişelin bəyanatı ciddi cəhdlə Minsk qrupunun danışıqlar prosesinə cəlb etməyə, onu "diriltməyə" çalışan Ermənistan və havadarlarını məyus etdi. Çünki, Şarl Mişelin bəyənatında Minsk qrupunun və Qarabağın adı çəkilmir. Ermənistan cəmiyyətini təşvişə salan məqam məhz bu idi. Belə olan halda artıq Minsk qrupunun danışıqlar masasında həm Azərbaycan, həm də Avropa İttifaqı üçün heç bir əhəmiyyətinin olmadığı açıq-aydın ortaya qoyulur.
Avropa İttifaqı Qarabağ mövzusunun Azərbaycanın daxili işi olduğunu qəbul edir və danışıqlar prosesində "Dağlıq Qarabağ" ifadəsi rədd edilir, onun əvəzinə "Qarabağ" ifadəsi istifadə olunur. Son görüşdə isə ümumiyyətlə Qarabağın adı çəkilmir. Cənab prezident İlham Əliyevin Minsk qrupunun fəaliyyətsizliyi haqqında fikirləri əsas götürülərək danışıqlar masasında qarşı tərəfin təzyiqlərinə baxmayaraq bu qurum haqqında bir söz belə deyilmir. Buradan bəlli olur ki, Azərbaycan tərəfi sülh danışıqlarının istiqamətini müəyyən edən tərəfdir. Bu vəziyyətdə Ermənistan tərəfinin revanşist hisslərə qapılaraq hərəkət etməsi gələcəkdə rəsmi Yerevanın daha çox güzəştə getməsinə gətirib çıxaracaq. Müzəffər ali baş komandanın dediyi kimi: Dəmir Yumruq Yerindədir! Odur ki, təxribata əl atmaq, xamxəyala qapılmaq, üçtərəfli müqavilənin şərtlərini pozmaq Ermənistana xeyirdən çox ziyan verəcək, baha başa gələcək. Ona görə də, Ermənistan tərəfi sülh müqaviləsinin tezliklə imzalanmasına maraqlı olmalıdır. Prosesin uzanması Azərbaycana elə də çox təsir göstərməyəcək. Ermənistan isə blokada şəraitində uzun müddət yaşaya bilməyəcək!