İyunun 3-də M. Maqomayev adına Azərbaycan Dövlət Akademik Filarmoniyasında Azərbaycan Bəstəkarlar İttifaqının sədri, Xalq artisti Firəngiz Əlizadənin anadan olmasının 75 illiyinə həsr edilmiş tədbir keçirilib.

Turaztv.az AZƏRTAC-a istinadən xəbər verir ki, tədbirdə mədəniyyət naziri Anar Kərimov çıxış edərək görkəmli bəstəkarın həyat və yaradıcılığından söz açıb. Qeyd edib ki, Firəngiz Əlizadə öz yaradıcılığı ilə milli mədəniyyətimizi Azərbaycanın hüdudlarından çox-çox uzaqlarda uğurla təbliğ edir. Onun əsərləri həm Vətəndə, həm də ölkə hüdudlarından kənarda tanınaraq müasir Azərbaycan musiqisinin inikasına çevrilib: “Bu gün Azərbaycan mədəniyyəti üçün əlamətdar bir gündür. Azərbaycan mədəniyyətinin inkişafında müstəsna xidmətləri olan və mədəniyyətimizin inkişafına xüsusi töhfələr verən bəstəkarın- Firəngiz Əlizadənin yubileyinə toplaşmışıq. Bu gün fəxrlə deyə bilərəm ki, Firəngiz xanım özünəməxsus dəsti-xətti olan bir bəstəkardır. Azərbaycan bəstəkarlıq sənətinin, klassik musiqi üslubunun zənginləşməsində əməyi olan bir şəxsiyyətdir. Firəngiz Əlizadə Azərbaycan musiqisini yüksək səviyyəyə qaldırmışdır. O Azərbaycan musiqisinə verdiyi töhfələrlə yanaşı çox saylı tələbələr də yetişdirib. Onun fəaliyyəti tək Azərbaycanla məhdudlaşmır, eyni zamanda, ölkə hüdudlarından kənara gedib çıxır. O, Azərbaycan mədəniyyətinin dünyada tanıdılmasına nail olan incəsənət xadimidir. Firəngiz xanımın fəaliyyəti beynəlxalq səviyyədə də yüksək qiymətləndirilmişdir. Dəfələrlə ölkəmizi beynəlxalq festivallarda uğurla təmsil edib. Təbii ki, dövlətimiz də Firəngiz xanımın sənət fəaliyyətini daim yüksək qiymətləndirib. Dövlətimizin başçısı tərəfindən görkəmli bəstəkarımız "Şərəf" və " Şöhrət" ordeni ilə təltif edilib”.

Nazir söyləyib ki, musiqi mədəniyyətinin inkişafında uzunmüddətli səmərəli fəaliyyətinə görə Firəngiz Əlizadə UNESCO-nun “Sülh artisti” mükafatına da layiq görülüb.

Qeyd edilib ki, daim yaradıcılıq axtarışında olan Firəngiz Əlizadə bu gün də ənənəsinə sadiqdir. O, Azərbaycanı, doğma Vətənini böyük məhəbbətlə sevir və ona şərəflə xidmət edir. Onun əsərlərinin sədası bundan sonra da dünyanın ən məşhur konsert salonlarından gələcək.

Diqqətə çatdırılıb ki, Firəngiz xanımın hər bir uğuru Azərbaycan musiqisinin geniş miqyasda nüfuzunun artması kimi çox mühüm bir işə xidmət edir. Bəstəkarın yaradıcılığı musiqişünaslar üçün əsl tədqiqat mənbəyidir. Onun yaradıcılığına dair bir sıra elmi-tədqiqat işləri yazılmış, eləcə də onun əsərləri dissertasiya səviyyəsində araşdırılmışdır. Firəngiz xanımın yaradıcılığı yalnız ifaçılarımız üçün deyil, musiqi elmimiz üçün də dəyərli bir mənbədir.

Tədbir Xalq artisti Fəxrəddin Kərimovun rəhbərliyi altında Üzeyir Hacıbəyli adına Azərbaycan Dövlət Simfonik Orkestrinin konsert proqramı ilə davam edib. Konsert çərçivəsində isveçrəli solist Marcis Kuplais və azərbaycanlı solist Xalq artisti Gülnaz İsmayılova çıxış edib.

Sonra Firəngiz Əlizadə çıxış edərək tədbirin təşkilatçılarına və iştirakçılara göstərilən diqqət üçün təşəkkür edib.