Səhərin müjdəsi dan, öp gözünün nuru ilə,
Dinlə gül tərifini bülbülün öz şuru ilə.

Qoy şəfəqlər darasın sübh şehinə tellərini,
Qəlbini eşqin isitsin əbədi qoru ilə.

Günəşin zərrəsi olsun sənə ilk dəstəmazın,
Dur könül səcdəsinə şükr elə dəsturu ilə.

Yox bu aləmdə kəsir, kainat ahəngə dalıb,
Təbiət həll eləyir hər şeyi düsturu ilə.

Yaşa zövqüncə, Müzəffər, verilən hər bir anı,
Gələcək hər səhərin çünki ümid suru ilə.