Xəbərlər
31.07.2026, 00:02
Alıcan İsgəndərli : Bir şəhid anası köçdü dünyadan - FOTO
Gülqayıd bibimin əziz xatirəsinə ithaf edirəm.
Qəmlə yola saldı ayları, ili,
Bir şəhid anası köçdü dünyadan.
Qəlbini sıxırdı dərdi, niskili,
Bir şəhid anası köçdü dünyadan.
Oğlu xəyalına gəlirdi hər gün,
Gəzirdi həyatda fikirli, üzgün.
Dərdlər ürəyində olmuşdu düyün,
Bir şəhid anası köçdü dünyadan.
Sevirdi Vətəni, doğma elləri,
Günəşdən uzanan isti telləri.
Daradı birbəbir ötən illəri,
Bir şəhid anası köçdü dünyadan.
Anaya övladı şəkərdi, baldı,
Ömründən kədərli anları qaldı.
Başının üstünü buludlar aldı,
Bir şəhid anası köçdü dünyadan.
Bilirdi, şəhidlik şərəfdi, şandı,
Bütün şəhidləri balası sandı.
Şamtək yavaş- yavaş qovruldu, yandı,
Bir şəhid anası köçdü dünyadan.
24.07.2026.
Son xəbərlər
Ən çox oxunanlar
- Bu gün
- Bu həftə
- Bu ay
