ŞEİR YAZMAQ İSTƏYİRƏM - Bəradər Səməndərli(Xanəliyev)

Xəbərlər

9.02.2022, 00:38

ŞEİR YAZMAQ İSTƏYİRƏM - Bəradər Səməndərli(Xanəliyev)

ŞEİR YAZMAQ İSTƏYİRƏM
Yenə gəncliyimi çözələyirəm,
Üfürüb tüstümü köz eləyirəm.
Köhnə dərdlərimi təzələyirəm,
Dəyişir əhvalım, solur bənizim,
Şeir yazmaq istəyirəm əzizim.

Ötəri şan-şöhrət nəyinə gərək,
İnsan insanlıqla öyünə gərək.
Yaşamaq eşqilə döyünür ürək,
Nə qədər göz görür, əsməyir dizim,
Şeir yazmaq istəyirəm əzizim.

Odundu, közündü, külündü ömür.
Gününündü, ayındı, ilindi ömür.
Kinodu, əsərdi, filmdi ömür,
Bir gün köçəcəyəm, qalacaq izim,
Şeir yazmaq istəyirəm əzizim.

Gör kimlər dünyanın qonağı olub,
Zor günlər bir ömrün sınağı olub.
İslamın əbədi çırağı olub,
Tarixdə öz sözün deyib sufizm,
Şeir yazmaq istəyirəm əzizim.

Payıza döndükcə, saralır yarpaq,
Açır qucağını yarpağa torpaq.
Bugünkü qocadır dünənki uşaq,
Sabahkı külumdü bugünkü közum,
Şeir yazmaq istəyirəm əzizim.

Halallıq qarışıb harama indi,
Yarpağa daraşıb barama indi.
Sən Allah, duz tökmək yarama indi,
Onsuz da əlimdə qalıbdı üzüm,
Şeir yazmaq istəyirəm əzizim.

Bəradər, kölgələr çəkilən deyil,
Əyri tin-döngələr səkidən deyil.
Şərikli yengələr əkilən deyil,
Sürüklə, getsinlər, görməsin gözüm,
Şeir yazmaq istəyirəm əzizim.

Bəradər SƏMƏNDƏRLİ
(Xanəliyev)
09.02.2022