"Azərbaycanda satılan dizel yanacağının keyfiyyəti nəinki Avropa ilə, Ukrayna, Rusiya, Qazaxıstan və s. ölkələrlə müqayisədə çox aşağıdır. Biz bu dizeli yeni avtomobilə tökən zaman, mühərrikdə dəhşətli səsin əmələ gəldiyinə şahid oluruq. Çox uzağa getməyək, Türkiyədə istismarda olan avtomobillərin 80 faizi dizellə çalışır. Amma bu səsin şahidi olmuruq. Burada keyfiyyət faktoru böyük önəm daşıyır" - Bu barədə əmlak məsələləri üzrə ekspert Ramil Osmanlı danışıb.
Azad İstehlakçılar Birliyinin sədri Eyyub Hüseynov Bizimyol.info saytına açıqlamasında bildirib ki, bu gün Azərbaycanda sadəcə, yanacağın keyfiyyətsizliyi deyil, eyni zamanda yanacaqdoldurma məntəqələrinin də istehlakçıları aldatması problemlərinə rast gəlinir.

Ekspert qeyd edib ki, yanacağın keyfiyyətsziliyi və avtomobilin bu səbəbdən sıradan çıxması ilə bağlı quruma müraciətlər daxil olur. Ölkədə müstəqil ekspertizanın olmadığı bir şəraitdə belə məsələlərin sübut olunması çox çətindir.

"Çox təəssüf olsun ki, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin də fəaliyyəti bu istiqamətdə ürəkaçan deyil. Hələ bir dəfə də olsun, bu sahədə istehlakçının tam hüququnu qorumağa nail ola bilməmişik. Ekspertiza məsələləri, dövlət orqanlarının əlində cəmləşdiyindən müstəqil ekspertiza yoxdur. Müstəqil ekspertizalar olsa belə, onların nəticələri məhkəmələrdə hüquqi sənəd kimi qəbul olunmur",- deyə ekspert bildirib. Onun sözlərinə görə, birliyə bir çox istehlakçılar müraciət zamanı bildirib ki, onlar xaricdən yeni avtomobillər gətirməsinə baxmayaraq, bir müddət sonra yanacağa görə mühərriklər sıradan çıxıb.

E.Hüseynov, bu məsələ ilə bağı bir çox servislərlə müzakirələr aparıb. O, deyir ki, servislər bu məsələyə fikir bildirməyə cəsarət tapa bilmir.

"Bu məsələ ilə birbaşa biznes qurumları məşğul olur. Biznes qurumlarının arxasında isə dövlət məmurları durur. Bu qurumlar "üç müşketyor" qanunu ilə işləyir. Heç kim bir-birinin bazarına toxunmur. "Birimiz hamımız, hamımız birimiz üçün" prinsipi ilə işləyirlər. Sonda isə istehlakçılar aldanır. Bəzi servislərdə benzinin oktanını müəyyən etmək üçün cihaz var. Mən dəfələrlə bu cihazdan almaq istəsəm də, heç kim cəsarət edib sata və ya verə bilmir",- deyən E.Hüseynov qeyd edir ki, Azərbaycanda yanacağın keyfiyyətsiz olması, servis mərkəzlərini zərərə salır.

E.Hüseynov istehlakçılara müraciət edərək, yanacaqla bağlı şikayətləri və müraciətləri dilə gətirmələrini tövsiyə edib. Onun sözlərinə görə, bu vəziyyəti düzəltmək mümkündür.

"Servis mərkəzləri vətəndaşlardan bu problemi gizlədirlər. Mən xarici ölkələrdə dizellə çalışan avtomobillərdə çox olmuşam. Və qətiyyən avtomobilin dizel və yaxud benzin mühərriki olduğu hiss olunmur. Azərbaycanda bu çox asanlıqla mühərrikin səsindən hiss olunur. Bu da onu göstərir ki, dizeldə problem var. Baxmayaraq ki, dizellə benzinin qiymətləri bir-birinə yaxındır, bəzi yanacaqdoldurma məntəqələrində dizelin premium benzinə qarışdırılması istisna edilmir",- deyə ekspert bildirib.

Ölkədə hər sahədə ictimai nəzarətə ehtiyac var. Bu gün istehlakçılar və servis mərkəzləri bu məsələ ilə bağlı səsini çıxarmadığı üçün biznes qurumları bundan sui-istifadə edir. Nəticədə isə, istehlakçılar aldadılır.