8 noyabr 2021-ci il Qələbəmizin 1 yaşı tamam oldu. Zəfər günü münasibəti ilə xalqımızı təbrik edirəm və sağlam həyat, daim aydın səma, sülh, əmin-amanlıq arzulayıram! Şəhidlərimizə Ulu Tanrıdan rəhmət diləyirəm, deyirəm:- rahat yatın qisasınız alındı! Ruhunuz şad olsun, yeriniz cənnət. Əbədiyyətə qovuşdunuz, and yerinə çevrildiniz-Ey unudulmazlar! 8-i Zəfər, 9-u Bayraq günü ölkəmizin hər yeri bayrağa bürünür və deyir:- gözün aydın Azərbaycan! 3 rəngli bayrağınla məsud yaşa! Ölkəmiz bu sınaqdan da belə çıxdı: Məğlub yox, Qalib ölkə! Odlar yurduna yalnız qələbə yaraşır. Başını dik tut, bayrağını uca-Ey vətəndaş! Bundan sonra quruculuq işləri başlanır, səni güllü-gülüstana-cənnətə çevirəcəyik ey Vətən! Azərbaycanımıza xoşbəxtlik, qazilərimizə can sağlığı, subay qazilərimizə, müharibə iştirakçılarına, övladlarımıza nişan toy-büsat, firavan və səadət dolu həyat tərzi yaraşır. Elə bu vaxt Vətənin müdafiəsinə qalxan, torpaqlarımızı işğaldan azad edilməsində iştirak edən, medala layiq görülən döyüşçümüz Orxandan belə bir zəng gəldi. Sizi toyuma dəvət edirəm. Çox sevindim və belə vəsf etdim.[/b]

Hörmətli valideynlər!

Ailələrinizin ən xoş gününə,
Məmuniyyətlə bizləri dəvət etdiniz!
Bəy və gəlin saf bir məhəbbətlə siz əhd etdiniz.
Üzükləri siz dəyişdiniz.
Nişan üzükləri barmağınızı sıxmasın,
Xoşbəxtlik gətirsin, barmağınızdan çıxmasın!
Qurulsun ailə dediyin “kiçik bir dövlət”,
Valideynlər, çəkməsin heç vaxt xəcalət,
Adət ənənəsinə, dövlət atributuna-
Olunsun hörmət!
Sevinsin, şənlənsin bir olsun hamı.
Toya hazırlaşsın toy adamları!
Nişan üzükləri- Gerbiniz olsun!
Çalınan vağzalı- Himniniz olsun!
O sevginin dühası, gəlinliyin fatası-
Kiçik bir dövlətin bayrağı olsun!
Ata nəsihəti, Ana öyüdü,
Qoy bu dövlətin dayağı olsun!
Buyurub gələn əziz qonaqlar,
Qədəmləriniz olsun Mübarək!
Əyləşdiyimiz məkan da, Xanın sarayı,
Səslənsin burada Koroğlu nərəsi-
Onun harayı!
Qoy dünya bilsin ki, Qarabağ Azərbaycandır!
Müharibədə qələbə çalan,
Bugünkü bəy igid oğlandır!
Dostlar, igidin adı da, özü də-
Elə Orxandır!
Əzizlərim, gəlin biz də deyək igid,
Nişanın da, toyun da mübarəkdir, Mübarək!
İgidlər həmişə xalqına, Vətəninə, elinə-
Gərəkdir gərək!

Hamlet Tofiqoğlu