IDEA İctimai Birliyi və Ekologiya və Təbii Sərvətlər Nazirliyinin birgə təşkilatçılığı ilə həyata keçirilən “Yaşıl Marafon” kampaniyası çərçivəsində ölkə ərazisinin meşə və qeyri-meşə fondu torpaqlarında ağacəkmə tədbirləri davam edir.

Ekologiya və Təbii Sərvətlər Nazirliyinin mətbuat xidmətindən AZƏRTAC-a bildiriblər ki, oktyabrın 27-də ölkə üzrə keçirilən payız ağacəkmə tədbirləri zamanı ümumilikdə 5 hektar ərazidə 8350 müxtəlifcinsli ağac əkilib, 100 kiloqram toxum səpilib. Belə ki, Ağcabədi rayonu üzrə iki hektar ərazidə 5 min ağac əkilib, 100 kiloqram toxum səpilib. Həmçinin Ağstafa rayonu üzrə bir hektar ərazidə 1000, Xaçmaz rayonu üzrə bir hektar ərazidə 1100, Şabran rayonu üzrə isə bir hektar ərazidə 1250 ağac əkilib.