1 oktyabr Prokurorluq orqanları ölkəmizdə qanunun aliliyinin təmin edilməsi, ictimai sabitliyə nail olunması, cinayətkarlığa qarşı mübarizə, vətəndaşların hüquq və azadlıqlarının qorunması işinə layiqli töhfə verir.

Turaztv.az AZƏRTAC-a istinadən xəbər verir ki, bu fikir Yevlaxda 1 oktyabr - prokurorluq işçilərinin peşə bayramı münasibətilə keçirilən tədbirdə səsləndirilib. Tədbir iştirakçıları əvvəlcə Şəhidlər xiyabanına gələrək Vətən uğrunda canından keçən igidlərin xatirəsinə ucaldılmış abidəni ziyarət ediblər.

Sonra ümummilli lider Heydər Əliyevin Yevlax şəhərinin mərkəzi meydanındakı abidəsi önünə tər çiçək dəstələri düzülüb, dahi rəhbərin xatirəsi ehtiramla yad olunub.
Yevlax Şəhər İcra Hakimiyyətinin başçısı Anar Tağıyev prokurorluq işçilərini peşə bayramı münasibətilə təbrik edib, işlərində uğurlar arzulayıb. Bildirib ki, ümummilli lider Heydər Əliyevin səyləri ilə ötən əsrin 70-ci illərindən etibarən prokurorluq orqanlarının fəaliyyəti təkmilləşdirilib, ədalətlilik prinsipləri təmin olunub. Ulu öndər Heydər Əliyevin hakimiyyətə qayıdışından sonra başlayan qurtuluş missiyası prokurorluq sistemində yeni inkişafı təmin edib, onun fəaliyyətinin əsasları sağlamlaşdırılıb. Prezident İlham Əliyevin hakimiyyəti illərində isə Azərbaycan prokurorluğu inkişafının növbəti mərhələsinə qədəm qoyub.
Tədbirin sonunda bir qrup prokurorluq əməkdaşına fəxri fərmanlar təqdim olunub.
Rayon prokuroru Ceyhun Almasov, polis şöbəsinin rəisi Elnur Mehdiyev və başqaları çıxışlarında ölkəmizdə hüquqi dövlət quruculuğunda, insan hüquq və azadlıqlarının qorunmasında, cinayətkarlığa qarşı mübarizədə prokurorluq orqanlarının rolundan danışıblar.