Azərbaycanın haqq səsini daha geniş müstəvidə yaymaq bizim əsas vəzifəmiz olmalıdır
Biz Azərbaycan gəncləri üçün Şuşaya səfər unudulmaz təəssüratlar bəxş edir. Bu qədim şəhər gözəlliyi ilə bizi elə bil ki, ovsunlayıb. Məşhur Cıdır düzünü internetdən, televiziya ekranlarından görmüşdük. Bu gün bu əsrarəngiz təbiət gözəlliyi ilə tanış olduqda elə bil nağıllar aləminə düşdük. Şuşanın hər qarışı bizim üçün doğmadır. Çünki, Şuşa Vətəndir.
Bunu AZƏRTAC-a müsahibəsində Şuşa şəhərində səfərdə olan Gənclər Təşkilatlarının Milli Şurasının sədr müavini Rafael Hacıbəyli bildirib.
O, qeyd edib ki, 44 günlük Vətən müharibəsində gənclər böyük qəhrəmanlıqlar göstəriblər: “Gənclərimiz Müzəffər Ali Baş Komandan İlham Əliyevin rəhbərliyi ilə torpaqlarımızın işğaldan azad olunması üçün böyük şücaət göstərdilər. Minlərlə igidimiz Vətən naminə canlarını belə əsirgəmədilər. İndi biz böyük qürur hissi ilə doğma Qarabağımıza səfərlər edir, tarixi ilə yaxından tanış oluruq. Bu gün hər birimizin könlündən bir şüar keçir: “Yaşasın Azərbaycan! Qarabağ Azərbaycandır!”.
R.Hacıbəyli gənclərimizi daha fəal olmağa səsləyib: “Müasir dünyada informasiya müharibəsi böyük rol oynayır. Bu gün Azərbaycanın haqq səsini daha geniş müstəvidə yaymaq bizim əsas vəzifəmiz olmalıdır”.
Son xəbərlər
Ən çox oxunanlar
- Bu gün
- Bu həftə
- Bu ay