Türkiyənin tanınmış aktrisası İrem Helvacıoğlu 17 ay evli olduğu həyat yoldaşı Ural Kaspardan boşandıqdan sonra ilk dəfə şəxsi həyatı ilə bağlı açıqlamalar verib.

“Qafqazinfo” Türkiyə mətbuatına istinadən xəbər verir ki, aktrisa Ege Kökenlinin “YouTube” proqramında qonaq olarkən analıq təcrübəsi, boşanma prosesi, yaşadığı çətinliklər və münasibətlərə baxışı barədə danışıb.

İrem bildirib ki, həyatında ard-arda baş verən hadisələr ona yaşadığı çətinliyi tam şəkildə hiss etməyə imkan verməyib: “Doğru zamanda, doğru qərar verdim və onu düzgün idarə etdim. Hadisələr bir-birinin ardınca baş verdiyi üçün yaşadıqlarımın ağrısını lazımi qədər hiss edə bilmədim. Anam mənə “Gəl, qızına bax, çox ağlayır” deyəndə “Özümü çox pis hiss edirəm. Bu hisslə onu qucağıma alıb əmizdirmək istəmirəm” dedim və hönkür-hönkür ağladım.
Ətraflı

Yaxşı ki, bunları yaşamışam. Bütün yaşadıqlarım mənə özümü sevməyi və dəyərimi bilməyi öyrətdi. Həyat eyni dərsləri mənə dəfələrlə göstərdi. Anlamadıqca daha ağır sınaqlarla qarşılaşdım. Həyat həmişə çox verəndən alır”.

Yeni münasibətə hazır olub-olmaması ilə bağlı suala cavab verən aktrisa bildirib ki, hazırda bunun üçün tezdir: “Yaxın zamanda yox. İndi mənim bir övladım var və onun məsuliyyətini daşıyıram. Həyatıma daxil edəcəyim insanı çox diqqətlə seçməliyəm. Buna görə də hələ qarşıda uzun bir zaman var. Amma özümü münasibətlərə tam bağlamamışam”.

Qeyd edək ki, 2024-cü ildə ailə quran cütlük 2026-cı ildə nikahlarını sona çatdırıb. Onların bir qız övladı var. Məlumata görə, İrem aliment və təzminat tələb etməmək şərti ilə qızına öz soyadını vermək barədə keçmiş həyat yoldaşı ilə razılığa gəlib.