​Görüşü giriş sözü ilə açan ADPU-nun Quba filialının direktoru, professor Yusif Alıyev Elvin Şükürovun əldə etdiyi respublika birinciliyinin təsadüf olmadığını, əksinə, illərin gərgin əməyinin, əzmkarlığın və filialda verilən keyfiyyətli ali təhsilin məntiqi nəticəsi olduğunu vurğulayıb. Professor çıxışında ADPU-nun Quba filialında tələbələrə hər zaman xüsusi diqqət və qayğı göstərildiyini, onların məhz ilk gündən auditoriyalarda "məzun" və ya sadəcə "tələbə" kimi deyil, bir gənc müəllim kimi qəbul olunduğunu, bu ali missiyanın ruhu ilə yetişdirildiyini, elə də müraciət edildiyini xüsusi vurğulayıb. Professor qeyd edib ki, bu cür parlaq nailiyyətlər həm ali məktəbin professor-müəllim heyətinin gərgin əməyinin, həm də bütövlükdə filialda formalaşan sağlam elmi-pedaqoji mühitin göstəricisidir. O, gənc müəllimə gələcək fəaliyyətində yeni zirvələr və uğurlar arzulayıb. Görüş zamanı professor Yusif Alıyev tərəfindən Elvin Şükürova müəllifi olduğu kitab hədiyyə edilib.
​Görüşdə çıxış edən Elvin Şükürov qazandığı bu böyük uğura görə ilk növbədə professor Yusif Alıyevə və doğma Universitetinin müəllimlərinə dərin minnətdarlığını bildirib. O, tələbəlik illərində əldə etdiyi fundamental biliklərin və rəhbər qayğısının imtahanda yüksək nəticə qazanmasında təməl rol oynadığını qeyd edib. Gənc müəllim çıxışı zamanı ən böyük arzusunun məhz yenidən doğma ocağa – ADPU-nun Quba filialına qayıdaraq magistr təhsili almaq və elmi fəaliyyətini burada davam etdirmək olduğunu böyük qürurla dilə gətirib.
​Tədbirdə çıxış edən digər iştirakçılar daElvin Şükürovun qazandığı bu möhtəşəm nailiyyətin bütün tələbələr və məzunlar üçün gözəl nümunə olduğunu bildirərək onu ürəkdən təbrik edib, xoş arzularını çatdırıblar. Sonda xatirə fotosu çəkdirilib.

Nəhayət ŞİRİNOVA
ADPU-nun Quba Filialı Heydər Əliyev Lektoriyasının müdiri.
Azərbaycan Jurnalistlər Birliyinin üzvü.