VAQİF QURBANOV,
Əməkdar mühəndis


Sayılıb-seçilən ziyalılardan olan “Muğansutikinti” MMC-nin təsisçisi, Əməkdar mühəndis Vaqif Qurbanov olduqca xeyirxah insandır. Bu xeyirxahlıq ona rəhmətlik atasından keçmişdir. Atası Ağayar Qurbanov da vəfalı dost, yaddaqalan ictimaiyyətçi, hər şeydən əvvəl gözəl qəlbə malik, öz mənliyini, şəxsiyyətini, alicənablığını hifz edib saxlayan xeyirxah, haraya çatan adam olub. O, sakit təbiətli, təvazökar, mülayim xarakterli, təmkinli, gülərüz, qayğıkeş, qonaqpərvər olmaqla yanaşı, eyni zamanda mənəvi dünyası bütün varlığı ilə ailəyə, qohuma, dost-tanışa, qonum-qonşuya, el-obaya, işlədiyi kollektivə, sözün geniş mənasında xalqa, Vətənə bağlı şəxsiyyət idi. Ağayar Qurbanov sağlığında hörmət və izzət qazanaraq cismani yoxluğundan sonra da çoxlarının xatirələrində əbədi yurd salmışdır. Bu gün də o, gözəl insan, sədaqətli dost, qayğıkeş ailə başçısı, təcrübəli mütəxəssis kimi xatırlanır. Vaqif Qurbanov da bu kimi xüsusiyyətlərinə görə atasına çəkmişdir.
Jurnalistlərimiz Vaqif Qurbanovun Sabirabad rayon qəzeti redaksiyasının kollektivinə etdiyi yaxşılığı heç vaxt unutmurlar. O, 2003-cü ildə, Milli Mətbuat Günü ərəfəsində qəzetin redaksiyasının köhnə, yararsız hala düşmüş binasını daxili imkanları hesabına əsaslı təmir etdirmişdir. Vaqif Qurbanov həmin il Milli Mətbuat Günü münasibətilə təbrikə gələndə qəzet materiallarının yığılıb səhifələnməsi üçün gərək olan bir dəst kompüter avadanlığını da bizə ərməğan etmişdir.
Media işçilərinin əməyini yüksək qiymətləndirən Vaqif Qurbanov qəzetimizə abunə yazılışını hər il yüksək səviyyədə təmin edir. Hər il Azərbaycan Milli Mətbuat Günündə sevincimizə şərik olub bizi hamıdan öncə təbrik edir, bu bayrama xüsusi diqqət yetirir, hətta maddi yardım etməyi belə unutmur.
Sözsüz ki, bir yazıda onun haqqında geniş danışmaq mümkün deyildir. Adam var ki, bütün ömrünü bir, hətta yarım səhifəyə sığışdırmaq olar. İnsan da var ki, həyat və fəaliyyətini bir kitaba sığışdırmaq çətindir. Vaqif Qurbanov məhz belə insandır. Onun haqqında cild-cild kitab yazmaq olar.
Çətin anda bizə etdiyiniz yaxşılıqlara görə kollektivimiz adından media təəssübkeşi kimi Sizə dərin təşəkkürümüzü bildirir, möhkəm cansağlığı, səadət və xoşbəxtlik, quruculuq işlərinizdə, fəaliyyətinizdə yeni-yeni uğurlar arzulayırıq! Allah qorusun Vaqif Qurbanovu.

Elçin NƏSİB,
“Kür-Araz” qəzetinin təsisçisi və məsul redaktoru